30 تطبيق تعليمي لإثارة الإبداع – مدونة خوجة

idea-1296144_640

Mind Shift

Read Original Article

اكتشاف الأدوات التعليمية عادة بيبقى تحدي للمدرسين اللي عاوزين يغيروا الطريقة اللي هم وطلبتهم بيشتغلوا بيها. و بما إن الوقت عادة مش بيكفي في الفصل، معظم المدرسين مبيقدروش ييجربوا التطبيقات المختلفة عشان يلاقوا التطبيق المناسب لإحتياجتهم. بس لحسن الحظ، فيه مجموعة من أمناء المكتبات المهتمين بالتكنولوجيا قرروا ينقوا من التطبيقات اللي زمايلهم بيعتبروها مفيدة ويتشاركوها مع بعض من خلال مجتمعات التَعَلُّم الشخصية (PLC) والندوات الأون لاين edWeb.

بيهتم المعلمين دول بالعادات الخاصة بيهم وبطلبتهم في شغلهم عشان يقدروا يعرفوا أنهي اتجاهات جديدة في التكنولوجيا ليها مستقبل. ميشيل لوتالا، أمينة مكتبة مدرسة في نيو كانان بولاية كونيتيكت، لاحظت أن معظم شغلها اتنقل من على الكمبيوتر لهاتفها الذكي، وأخدت بالها أن هو ده الحال مع الطلبة كمان لكنها مدركة أن لوائح معظم المدارس فيها سياسات ضد استعمال الهواتف عشان الطلبة ميفقدوش تركيزهم.

في رأي لوتالا، السياسات دي بتعبر عن انفصال المدرسة عن الواقع عشان الهواتف الذكية بقت بتساعد انتاجية الطلبة اكتر من أي وقت مضى. ساعات كتير لوتالا بتسمع من المدرسين وزمايلها إن الهواتف مش مفيدة عشان شاشاتها الصغيرة مش بتخلي الطلبة يقروا ويكتبوا بسهولة، بس ده بيخلي لوتالا تتساءل عن ما إذا كان الكلام متمركز جدا حول استخدام أجهزة جديدة بطرق قديمة.

لوتالا قالت في ندوة edWeb أنه “لو هي دي المشكلة في التعليم عبر الهاتف الذكي، فالنوع ده من التعليم مش على طول محتاج قراءة وكتابة. إحنا مش عاوزين التكنولوجيا تبقى بدل للي إحنا بنعمله.” الأمل الحقيقي في التكنووجيا التعليمية هي اعادة تعريف الطرق اللي الطلاب بيتعلموا بيها. ده مش معناه أن القراءة والكتابة مش هيكونوا جزء مهم في التعليم، لكن ممكن يكون معناه أن القائمين على العملية التعليمية محتاجين يفكروا بطرق خلاقة في أحسن استخدام للأدوات الفعالة والمنتشرة زي الهواتف الذكية.

من واقع إهتمامها بإنتاجياتها اليومية، التغيرات الجديدة اللي تطبيق Audible عملها عاجبة لوتالا عشان بقت تقدر دلوقتي ترتب مصادر إخبارية مختلفة في قنوات بتتقري لها بصوت عالي وهي بتحضر نفسها أو في طريقها للشغل. وأضافت لوتالا أن كون الجرايد بتتقري لها بصوت عالي عن طريق تطبيق فدي حاجة غيرت حياتها.

هي كمان مبسوطة أن العروض التقديمية في Google Slides بقت بتسمح للمستخدمين أنهم يضيفوا رسوم بيانية، وشايفة انها كانت حاجة لازم تتعمل من زمان لأنها بتزود وظائف (وبالتالي إمكانيات) التطبيق. بالإضافة لتسليط الضوء على شوية من أدوات التعلم الرقمية المفضلة ليها، دعت لوتالا مجتمعها التعليمي المهني أنه يوصي بتطبيقات التعلم المفضلة ليهم. مع بعض، قدروا إنهم يوفروا القائمة دي للمعلمين المشغولين اللي بيحاولوا يلاقوا الأداة التكنولوجية المناسبة.

30 تطبيق بيوصي بيهم أمناء المكتبات:

Adobe-Capture Adobe Captureلوتالا قالت أن الطبيق ده واحد من أكتر حاجتين جُداد مفضلين عندها. التطبيق بيخلي المستخدم يصور أي حاجة وبعدين يتتبع خطوطها العريضة (يعملها سكتش). يقدر بعد كده الطالب يمسح أجزاء، يلونها، أو يطور الرسمة، وكله بيرتكز على الإسكتش الأوّلي اللي بتقدمة الصورة. وأضافت لوتالا أن التطبيق ده حقق حلمها، عشان مع انها مبتعرفش ترسم كويس، الا انها فنانة كويسة، وأضافت: “التطبيق غني جدا.”

Adobe-Voice

Adobe Voice:  التطبيق اللي بقى اسمه دلوقتي Adobe Spark بيوصي بيه أمناء المكتبات لأنه وسيلة سهلة للأطفال بيرفقوا بيها مذكرة صوتية مع صورة، فممكن يبقى أداة عرض كويسة. وقالت لوتالا إنه رغم أنك لازم تشترك في التطبيق، إلا إنك مش لازم تدفعله فلوس، فمتخليش عملية الاشتراك تخليك تصرف نظر.

Photo-Editor

Photo Editor من Aviary: تطبيق قوي بيسمح طلاب أنهم يعدلوا في الصور عشان يطلعوا نتائج رائعة. التطبيق ده بيفكر لوتالا بالفوتوشوب بس للهواتف الذكية.

Bloxels

Bloxels: التطبيق الجديد لابتكار الألعاب، وده بتقدمه نفس الشركة اللي عملت Pixel Floor Press فالتطبيقين متوافقين. التطبيق بيسمح للمستخدم إنه يبتكر الشخصيات اللي هيكونوا في اللعبة. شانون ميلر اللي شاركت في تقديم الندوة، قالت أنها بتستخدم التطبيق في إنها تعيد حَكْي الأغاني اللي الأطفال بيتعلموها في الحضانة مع طلبتها اللي في خامسة إبتدائي.

Book-editor

Book editor: التطبيق ده بيشتغل أحسن مع منتجات شركة آبل، وبيتيح للأطفال أنهم يبتكروا كتب. ميلر شايفة إنه مع إنه صعب شوية، ومناسب أكتر للكبار، الا انه بيبقى أسهل لما تتعود عليه.

buncee-400x400

Buncee: التطبيق ده بيتيح للمستخدمين إضافة الصور والنصوص والفيديو وملصقات تفاعلية لمنتج موجود بالفعل. شانون ميلر بتحب تحط إضافات تفاعلية على شغل طلبتها، أما بنتها اللي بتدرس في الجامعة فبتستخدمه لتقديم العروض لأنه أداة جيدة لحَكْي القصص. يقدر الطلبة كمان أنهم يعملوا عليه مشروعات منفصلة وبعدين يضيفوها لبعض لخلق مشروع تعاوني. النتيجة النهائية مبينفعش تتطبع بشكل كويس، لكن ممكن يتعملها رمز استجابة سريعة (QR Code) عشان يتعرض من خلال التطبيق أو أون لاين.

easy-Blogger-400x400

Easy Blogger Jr: مع إن في مدونات كتير كويسة يقدر يسخدمها الطلبة، الا إن ميلر بتوصي بإستعمال البرنامج ده إتباعاً لمُدرسة إبتدائي إسمها كاثي كاسيدي بتستخدمه مع طلبتها في أولى ابتدائي. شانون ميلر كمان بتحب Kidblog و Edmodo بس هي شايفة أن Easy Blogger Jr أسهلهم على الطلبة الصغيرين وبتقول انه بدل ما تطلب من أطفال عندهم خمس و ست سنين أنهم يفتكروا أسماء المستخدمين وكلمات السر، يقدروا يسجلوا دخولهم بالصور. التطبيق بيكلف 5،99 $ بس موقعه على الإنترنت مجاني.

Edpuzzle-400x400

Edpuzzle: أمين مكتبة اسمه جاي ساليرنو رشح التطبيق ده، وهو بيعتبر أداة عظيمة للمعلمين اللي بيتبعوا طريقة الفصل المنعكس. لوتالا قالت انه ممكن إضافة عناصر تفاعلية للتعليم عن طريق الفيديو أثناء تطبيق طريقة الفصل المنعكس. أحد الجوانب اللي بيتطلب الحذر في الطريقة دي هو أن المحاضرة حتفضل مسيطرة بس في شكل مختلف. إضافة عناصر تفاعلية هي وسيلة كويسة لإجبار الطلاب على التفاعل مع المواد، ولما يكونوا متفاعلين بشكل أكبر، فضولهم هيزيد.

Flipster

Flipster: وده عبارة عن تطبيق للمجلات الرقمية سهل علي الطلبة إكتشافه. لوتالا لما لقت أن الطلبة عادة ما بينسوا أن المجلات الرقمية مصدر متاح ليهم، خلت نتائج البحث اللي بيلاقيها Flipster تظهر كجزء من النتائج اللي بتظهر في أي بحث بيعملوه على جوجل. بس لوتالا حذرت أن أي محاولات تقديم منصة إلكترونية جديدة ممكن تاخد 3 سنين لحد ما يتعود عليها المستخدمين. بشكل عام التطبيق بيحاول يخلي تجربة قراءة مجلة رقمية أكثر سلاسة.

Gboard-400x400

GBoard: ميلر قالت أن التطبيق ده من الحاجات الجديدة المثيرة. التطبيق المجاني بيسمح للمستخدم أنه يدور في جوجل وهو بيكتب رسالة نصية على الهاتف الذكي. يعني مثلا لو مُدرّسة بتبعت رسالة لولي أمر عن حدث هيتعمل قريب، ممكن تدور على صفحة الحدث ده علي الإنترنت وترفقها في الرسالة.

Goodreads

Goodreads: لوتالا بتحب التطبيق ده لأنه بيخلي القراءة نشاط اجتماعي. يقدر الطلبة يدوروا في قوائم كتب زمايلهم على افكار. كأمينة مكتبة، لوتالا قالت أنه بيوفر وقت كبير على المدرسين اللي بيحضروا قائمة كتب للقراءة في الصيف. كمان بتقدر انها تعمل مسح لباركود الكتاب فتقدر تضيف من 50 لـ 100 كتاب وترتبهم في قوائم وتضمها لموقع المكتبة أو في رسائل للبريد الإلكتروني للطلاب. ميلر كمان بتوصي بـ Biblionasium كبديل كويس للطلبة الصغيرين بالذات عشان يقدروا من خلاله يرشحوا الكتب لبعض. لو المكتبة بتستخدم Follett Destiny، فبردو فيه وظائف مدمجة لمشاركة المحتوي.

Gum

GUM: مع ان التطبيق ده مش مصمم للتعليم، الا ان ميلر قالت انها شافت مدرسين بيستعملوا لوحة حفظ المقتطفات (pinboard) الاجتماعية المجانية بطرق مبتكرة. التطبيق بيخلي المستخدم يقدر يمسح كود الـ ISBN بتاع الكتب أو باركود اي منتج واضافة تعليقات عليه. ممكن الاستفاده من التطبيق في فصل مادة العلوم (أثناء دراسة موضوعات لها علاقة بالصحة) والطلبة بيتعلموا مكونات المواد الغذائية، أو في فصل مادة اللغة الانجليزية عشان بيتيح للطلاب أنهم يضيفوا تعليقات ومراجعات للكتب اللي قروها.

Kiosko-400x400

Kiosko: التطبيق ده بيوفر قاعدة بيانات للأخبار من سنة 1945 ولحد دلوقتي. لوتالا قالت أنه بيتيح الصفحات الأولى للجرايد من حول العالم. وعشان كده بيعتبر أداه قوية للطلبة اللي بيجمعوا معلومات من منظورات مختلفة عن أحداث تاريخية. فعلى سبيل المثال، يقدر الطالب انه يقرأ جرائد سوفيتية، مع انه ممكن يحتاج تطبيق لترجمة اللغة الروسية. لوتالا أضافت أن بما أن مناهج مدرستها بتتمحور حول تاريخ العالم، فمهم أن الطلبة يشوفوا الأحداث من خلال عيون الآخرين.

Lark-by-Storybird

Lark من Storybird : وده عبارة عن أداة رقمية لحَكْي القصص، وبيعتبر كويس جدا للشعر، ومتاح مجانا للهواتف الذكية وكموقع علي الإنترنت. بيساعد الأطفال إنهم يضيفوا للشعر اللي بيكتبوه صور ونصوص تعبر عن مشاعرهم. المنتج ممكن تحتفظ بيه بشكل خاص، تنشره أو تطبعه.

Lego-Movie-Maker-400x400

LEGO Movie Maker: التطبيق ده شركة ليجو هم اللي عاملينه، وبيشتغل بتقنية الحركة الثابتة (أشياء ثابتة بتتصور ورا بعض بشكل يدي إنطباع إنها بتتحرك زي الفيديو ده)، وبيعتبر حل سهل لعمل الفيديوهات من أي نوع. شانون ميلر بتحب البرنامج ده عشان عدد ن الأسباب منها سهولة اضافة العناوين فيه وسهولة اننا نخلي الحركة أسرع أو أبطأ. 

LucidChart-400x400

LucidChart: بتحب لوتالا أنها تقدم لطلبتها اختيارات كتير لتطبيقات تساعدهم على رسم الخرائط الذهنية، عشان عايزاهم يلاقوا الأداة المناسبة ليهم اللي تتيح لهم أنهم يفكروا ويعبروا بطريقتهم. بس بشكل شخصي، هي بتفضل LucidChart عشان بتقدر بسهولة تحوِّل جداول البيانات لمخططات (flowcharts). لوتالا بتعتبر التطبيق منظم جدا وغني بالإختيارات المتاحة فيه.

Nearpod

Nearpod: لوتالا شايفة أن التطبيق ده ممكن يغير حاجات كتير. هي عادة كانت بتحضر الدروس على العروض التقديمية من جوجل Google Slides واللي في الاخر بيحول العرض لفيديو، بس ده مش بيدي مساحة للطالب أنه يتفاعل مع العرض. لكن التطبيق ده بيتيح لها انها تضيف الأسئلة والاختبارات لعروضها وانها تخلي الطلبة يتشاركوا صور وروابط لمواقع علي الإنترنت. لو كل طالب معاه جهاز إلكتروني، يقدر المدرس انه يسأل الطلبة كلهم سؤال وبعدين يبعتلهم اجابته. فعلى سبيل المثال لوتالا سألت مرة طلبتها لو كان لازم يستشهدوا بالمصدر في حالة الاقتباس، نص الفصل جاوب بـ”لأ” وده تصور خاطئ حبت إنها تصححه بسرعة، فببعتتلهم نتيجة السؤال وأظهرت إجاباتهم كمان عشان تسيب لهم رسالة مؤثرة.

NYTVR

New York Times VR: واحد من تطبيقات السفر عبر الواقع الافتراضي الجديدة، وبيتيح للطلاب أنهم يشوفوا أماكن ممكن مايجلهمش الفرصة انهم يزوروها.

pixelpress-400x400

Pixel Press Floors: التطبيق ده لابتكار الألعاب، وهو المفضل بالنسبة لأمين المكتبة جويس فالينزا. يقدر الطلبة انهم يبتكروا ألعاب الفيديو الخاصة بيهم عن طريق ترتيب البلاط بأنماط مختلفة. الشركة اللي عاملاه هي نفس شركة Bloxel، و ده بيتيح للأطفال انهم يستخدموا الشخصيات اللي ابتكروها هناك في لعب التطبيق ده. التطبيق متاح لأجهزة الـ iOS بس.

Quizlet

Quizlet: لوتالا قالت ان التطبيق ده لعمل خطط دراسية، وبدأ الإنتشار في المدرسة الثانوية بمدينة نيو كانان واستخدامه زاد ما بين الطلبة مش المدرسين. الطلبة بيستخدموه في كل حاجة وعشان يعملوا بطاقات تعليمية يذاكروا منها لنفسهم. المثير للاهتمام كمان ان تطبيق Kahoot بقى من تطبيقات الطلاب المفضلة، مع انهم مش بيستخدموه بالضرورة للدراسة. لوتالا لاحظت انهم بيستعملوه للأنشطة الاجتماعية زي تنظيم الحفلات، ومع انه اداة مصممة في الاساس للتعليم، بيستخدمها الطلاب بطرق مختلفة تماما.

Shadow-Puppet-400x400

Shadow Puppet: من تطبيقات جاين لوفتون المفضلة. التطبيق سهل الاستخدام وبيتيح للأطفال من عمر الخمس سنين أنهم يعملوا فيديوهات. ممكن يضيفوا صوتهم لصور ويعرضوا افكارهم أو قصصهم. التطبيق ده متاح لأجهزة الـ iOS بس.

Skitch

Skitch: التطبيق ده من التطبيقات المفضلة لشانون ميلر من فترة طويلة، مجاني وممكن دمجه مع Evernote، والأخير بيملك الأول. التطبيق بيتيح للمستخدمين انهم يضيفوا هوامش، يرسموا دواير حوالين الغلطات و يضيفوا نصوص أو اسهم، الخ… ميلر اضافت انها بتستخدمه كتير على هاتفها الذكي.

MindMup

MindMup: آداة أمين المكتبة جاي سليرنو المفضلة لرسم الخرائط الذهنية، وهي موجودة في صورة امتداد لمتصفح جوجل كروم، عشان كده بتندمج بشكل كويس مع منتجات جوجل التانية. لوتالا شايفة انه كويس انك تدي الطلبة خيارات كتير لما تطلب منهم يعملوا رسم توضيحي لأفكارهم.

Masterpiece-by-Osmo

Masterpiece من Osmo: التطبيق ده ممكن يكون حل لتعدي بعض الطلاب على حقوق التأليف والنشر من غير قصد. لوتالا بتقول ان طلابها بيتطلب منهم حكي القصص الرقمية طول الوقت، فعادة ما بيستخدموا صور رقمية، ومع انها بتشرح لهم على طول ازاي يلاقوا مواد صديقة لحقوق التأليف والنشر (مسموح إعادة استخدامها بحيث لا تنتهك حقوق التأليف والنشر)، الا انهم ساعات مش بيتبعوا التعليمات. Osmo بيديهم فرصة يعملوا صور خاصة بيهم وفي نفس الوقت بيعلمهم قيمة الملكية الفكرية. أول ما بيفهموا قد ايه صعب عمل صورة جميلة، عادة ما بيقل اقتباسهم لحاجات ناس تانية من غير ما يقولوا.

Scratch2

Scratch وتطبيقات تانية زيه: كل امناء المكتبات اللي اضافوا للقائمة دي شايفين انها فكرة عظيمة ان الطلبة يبدأوا يتعلموا البرمجة من سن صغير. Scratch، و Scratch Jr، و Hopscotch من التطبيقات المحببة ليهم. وللطلبة الصغيرين، ميلر بتنصح بـ Kodable و Daisy the Dinosaur.

Seesaw-400x400

Seesaw: تطبيقات البورتوفوليو أو الحافظة الألكترونية بقت مهمة بطريقة متزايدة بما ان المعلمين وأولياء الأمور بدأوا يفهموا أهمية الحفاظ على سجل للشغل. اشتغلت شانون ميلر في مدرسة تعتمد علي التعليم القائم على المشاريع ولها معايير خاصة، وكان من المهم أن يكون الطالب قادر على توثيق نموه في العملية التعليمية على مدار السنة. واضافت ميلر أن الطلاب بيحبوا التطبيق ده عشان بيخليهم قادرين يتتبعوا كل شئونهم التعليمية من خلال بورتفوليو رقمي، هى آداة جمع وتنظيم قوية.

spiderscribe

SpiderScribe Jr: التطبيق ده اختارته الجمعية الأمريكية لأمناء المكتبات المدرسية (AASL) كتطبيقهم المفضل لرسم الخرائط الذهنية.

storyboard-e1464133272127

Storyboard That: أمناء المكتبات لاحظوا أن عدد المدرسين اللي بيطلبوا من الطلاب انهم يصوروا القصص (يحطوها في شكل صور ورسومات وأشكال بحوار واتجاه معين) قبل الكتابة في تزايد. جاي ساليرنو شايف ان التطبيق المقدم من متصفح جوجل كروم ده مناسب جدا لعمل قصص مصورة. Celtx Shots هو بديل تاني موصى به.

fuse-e1464133422700

TechSmith Fuse: التطبيق ده بيوفر طريقة سهلة تنقل بيها الصور من على الهاتف الذكي للكمبيوتر. بس ميلر حذرت أنه احتمال ميفضلش مجاني.

terraria-e1464133555110

Terraria: اللعبة دي بالنسبة لابن شانون ميلر اللي في خامسة ابتدائي منافسة لـ Minecraft وعشان كده بيوصي بيها، بيحبها عشان اسهل من Minecraft. تكلفتها 4.99 $ وعاجبة ميلر نفسها عشان الشخصيات فيها شكلهم واقعي اكتر من Minecraft.

What-was-there

What Was There: لوتالا قالت: “في التطبيق ده، المستخدم بيقف في حتة، خاصة في مدينة، والتطبيق بيلاقيك على الخريطة وبيقولك كان في ايه هنا زمان، التطبيق مؤثر جدا”. التطبيق بيظهر الشارع من خرائط جوجل مع تراكب تاريخي مرئي. ممكن للطلاب كمان انهم يضيفوا محتواهم، وده بيخلّي البرنامج آداة رقمية مرحة لحكي القصص أو لفحص المصادر الأولية.

Yakit

YAKit: هي آداة للتلاعب بالصور، بتضيف المرح لعملية حَكيْ القصص الرقميةعن طريق تمكين الطلاب من انهم يحركوا العيون والأفواه. ميلر بتحبها عشان فيها خصائص تانية غنية مناسبة للطلاب الأكبر. هي ساعات كمان بتستخدم Chatterpix.

 

كتبت المقال الأصلي:

كاترينا شوارتز (حساب الكاتبة علي تويتر)

قامت بترجمة المقال:

أ.قسمت طه

مصادر الصور:

Pixabay

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s