محرك البحث كيدل: جوجل للأطفال – مدونة خوجة

Screen Shot 2016-06-23 at 10.14.42 PM

Tech Times

Read Original Article

كيدل هو محرك بحث مفصل للأطفال بيظهرالمحتوى المناسب بس، باستخدام خصائص البحث الآمن من جوجل.

منقدرش نتصور العالم من غير جوجل

لو افتكرنا أيام زمان في المدرسة، كنا بنضطر نروح للمكتبة عشان نكتب التقارير ونلاقي أفكار جديدة لبحوثنا وتجاربنا. بس دلوقتي مع الإنترنت، المذاكرة والواجبات بقوا بيتعملوا بسهولة.

اليومين دول الموضوع بقى بسيط جدا على الأطفال. هم مش بس عندهم هواتف ذكية عشان يتواصلوا بيها مع صحابهم برا المدرسة، دول كمان بيعرفوا يتعاملوا مع الكمبيوتر بحرفية أكتر من أهاليهم. ومع إن الموضوع ده المفروض يبقى شيء عظيم، السلبيات بتبتدي تظهر لما الأطفال يدوروا على حاجة على الإنترنت ويطلعلهم حاجات غير مناسبة ليهم.

بس دلوقتي الأهل يقدروا يستريحوا عشان الأطفال بقوا يقدروا يستخدموا نسخة مخصصة ليهم من جوجل لما يدخلوا على محرك البحث كيدل.

كيدل، اللي لسة بيستخدم ألوان لوجو جوجل المعروفة، بدل خلفية الصفحة الرئيسية البيضاء لجوجل، بخلفية فيها رسومات للفضاء الخارجي: كواكب بعيدة وروبوت فضائي عايش على كوكب مليان حفر في المقدمة تحت شريط البحث.

كيدل كمحرك بحث بصري للأطفال بيدعمه محررين بالإضافة لخاصية البحث الآمن في جوجل، بيسمح للأطفال أنهم يدوروا على مواقع إنترنت وصور وأخبار وفيديوهات. وبمجرد أن الطفل يدخل استعلام في شريط البحث، بيظهر كيدل قائمة من الروابط ذات الصلة. أول 1-3 نتائج بتشمل المواقع والصفحات الآمنة اللي اتكتبت خصيصا للأطفال وتم اختيارها وفحصها من قبل المحررين.الـ 4 -7 نتائج اللي بعديهم هي المواقع اللي تتضمن محتوى مكتوب بلغة بسيطة عشان يستوعبها الأطفال الصغيرين. دول كمان بيتم اختيارها وفحصها من قبل المحررين. الرابط الثامن واللي بعده فيهم المواقع المكتوبة للبالغين اللي بيتم تصفيتها عن طريق البحث الآمن لجوجل، بس فهمها أصعب على الأطفال.

هتلاقي في صفحة المعلومات حول كيدل أن “بما إن نتائج كيدل إما بيتم اختيارها وفحصها من قبل المحررين عندنا أو تصفيتها عن طريق البحث الآمن من جوجل، تقدر تضمن أنك هتحصل على نتائج موجهة للطفل من غير أي مضمون غير مناسب، وفي حالة وجود بعض الألفاظ السيئة في الاستعلام اللي الطفل بيدور عليه، الروبوت الحارس للمحرك بيحجب البحث”.

على سبيل المثال، لو دور الطفل على المغنية مايلي سايرس، حساباتها على تويتر وانستاجرام مش هتظهر، اللي هيظهر بس هي السير الذاتية المناسبة لجميع أفراد الأسرة عنها.

يمكن للأهل حجب كلمات تانية عن طريق تقديم نموذج، ويمكن كمان أنهم يطلبوا منع موقع شايفينه غير مناسب للأطفال.

الاختلافات الرئيسية التانية هي أن نتائج البحث في كيدل بيبقى فيها رسوم توضيحية أكتر مع تكبير الصور المصغرة و بتبقى مكتوبة بخط Arial كبير عشان يقدر الاطفال أنهم يقروا النص بشكل أحسن.

محرك البحث أيضا مبيجمعش أي معلومات شخصية، وبيمسح السجلات في كل 24 ساعة.

كتبت المقال الأصلي:

لورِن كيتينج (صفحة مقالات الكاتبة علي الموقع الأصلي)

قامت بترجمة المقال:

أ.قسمت طه

 

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s