وداعا للكتاب الخارجي.. أهلا “تقويم” – مدونة خوجة

HighlightImage

في أوائل إبريل، استضاف الجريك كامبس وسط القاهرة قمة التعليم والإبداع “إيديوفيشن” بعشرات الورش والمحاضرات والنقاشات. وعلى مدار اليومين، كان فيه معرض لمشروعات وشركات ومبادرات تعليمية مختلفة اتعرفنا فيه على “تقويم” وهو بوابة تعليمية أونلاين تثري المحتوى الرقمي العربي وبتدعم العمل الجماعي وانطلقت بعد أيام من المؤتمر.

“تقويم” هو موقع لـ”ما بعد الشرح” يعني مهتم بالاختبارات والتقييمات لطلاب المدارس من 3 ابتدائي لحد 3 إعدادي والسنة الأخيرة في الثانوي بهدف تحويل العملية التعليمية لعملية ممتعة مش في مصر بس لكن كمان في الخليج. دردشنا شوية مع محمد عاطف واحد من المؤسسين المشاركين التلاتة ومسئول تطوير الأعمال بالشركة.

ايه المختلف؟

“تقويم” مش بيهتم بالحفظ لكن باستيعاب المعلومة لتطبيقها بأشكال مختلفة. وفي الإطار ده، بيشرك أطراف العملية التعليمية كلها علشان يكونوا جزء من عملية التغيير سواء المدارس أو المدرسين (بتوع المدرسة أو المدرسين الخصوصيين) وأولياء الأمور والطلبة فالطالب بيسجل حساب شخصي ليه على الموقع علشان يبدأ ياخد الامتحانات والتدريبات. بيختار الطالب مادة من المواد الأساسية عنده ويحدد الفصل أو الجزء المراد اختبار قدراته فيه ويبدأ يمتحن. كل اختبار فيه من 10-20 سؤال اتحطوا على أسس تربوية ونفسية وحسب تصنيف بلوم Bloom Taxonomy المعتمد على 6 عناصر هي التذكر والفهم والتطبيق والتحليل والتقييم والابتكار أو الخلق. الطالب بيحل الأسئلة خلال وقت معين بعد ما يكون ذاكر وبتطلعله النتيجة فورية مع تحديد الإجابات الغلط وتصحيحها واقتراحات لامتحانات تالية بناء على تاريخ الاختبارات الخلصانة. بخلاف الامتحانات، فيه كمان تدريبات غير محددة بوقت معين وعدد أسئلتها مفتوح.

بالنسبة للمدرس، لو مدرس مدرسة هيشترط إن مدرسته تكون مسجلة هي كمان وفيه تعاون بينها وبين الموقع. المدرس الخصوصي كمان يقدر يسجل والاتنين بياخدوا مساحة ببلاش يقدروا يحطوا فيها واجبات وامتحانات للطلبة بتوعهم سواء في المدرسة أو في الدرس تكون مقفولة عليهم. الطريقة دي بتسهل على المدرس متابعة كل طالب في دراسته عن طريق الأرقام والاحصائيات زي عدد مرات إنجاز الواجب ودرجاته السابقة في الامتحانات وغيرها. أما ولي الأمر فبيسجل حساب شخصي على الموقع ويقدر يضيف ابنه أو بنته عليه بحيث يتابع إنجازاتهم.

ازاي الأسئلة بتتحط؟

الامتحانات والتدريبات المنشورة على “تقويم” حطها 100 مدرس في 3 شهور لمناهج ابتدائي وإعدادي باللغة العربية في المدارس الحكومية والخاصة اللي بتقدم منهج حكومي في مصر وهيتضاف لاحقا المناهج العلمية اللي بتتدرس باللغة الإنجليزية زي الكيمياء وغيرها. المدرس بيمسك المادة ويقسمها لفصول وأجزاء ومجموعة دروس بعدين يحط الأسئلة حسب تصنيف بلوم علشان يراجعها مدرسين أعلى منه شوية وأكتر خبرة وفي الآخر بيتم إدخال البيانات والصور مع المراجعة اللغوية من مدرس لغة عربية.

العملية دي كلفت حوالي 600 ألف للتيرم الواحد بتمويل من مستثمر مصري زي ما قال محمد. حسب الخطة، الموقع انطلق من مصر في شهر إبريل بتغطية 7 مناهج دراسية لسبع سنين مختلفة وهيتوسع في دول الخليج وتحديدا الكويت والسعودية وسلطنة عمان علشان يغطي 4 مناهج دراسية هي 6 ابتدائي والمرحلة الإعدادية كلها وأخيرا الإمارات اللي هيغطي الموقع فيها كل السنوات الدراسية من ابتدائي لحد الثانوي. ومتوقع السنة الجاية تضاف المناهج الدراسية المعتمدة في المدارس الدولية في مصر ما عدا نظام IGCSE والأمريكان دبلومة. فيه 5 مدرسين مشاركين في وضع المحتوى على “تقويم” هيشتغلوا بشكل دائم لزيادة الأسئلة والتطوير فيها.

HighlightImage2

بتكسبوا منين؟

من الاشتراكات. الطالب بيدفع 50 جنيه في التيرم الواحد للمواد الأساسية اللي بيدرسها كلها فيما عدا 3 ثانوي بيدفع فيها 200 جنيه، وبيدفع 20 دينار في الكويت و200 ريال في السعودية و20 دينار في سلطنة عمان و200 درهم في الإمارات. الموقع عقد شراكات كمان مع مجموعة مدارس غير هادفة للربح في الكويت ومع مستثمرين مهتمين بالتعليم علشان يكونوا وكلاء أو مسئولين عن التسويق. يمكن لاحقا يبقى فيه رسوم على المدارس للتسجيل رسميا في الموقع لكن حتى الآن الموضوع مش أكيد لأن المدارس دي لو سجلت في “تقويم” بشكل مجاني هتكون دعاية كبيرة للموقع. حاليا الدعاية شغالة أونلاين وأوفلاين في مراكز الدروس الخصوصية. المنافس الأكبر لـ”تقويم” لسه هو الكتاب الخارجي.

انتو مين؟

أحمد سعد هو المؤسس وأنا محمد عاطف واحد من 3 مؤسسين مشاركين ومسئول عن تطوير الأعمال business development.

هيحصل ايه الفترة الجاية؟

توسع إقليمي في دول الخليج المشار ليها سابقا وكمان هيحصل تطوير مركز على 3 حاجات؛ الأولى “الجاميفيكيشن” بإطلاق لعبة على الموقع تساعد في موضوع الامتحانات وتخليها ممتعة بشكل أكبر بإضافة عنصر المنافسة بين المدارس وبين المجموعات المختلفة، والتانية خدمة مساعدة شخصي يساعد الطالب على الموقع عن طريق الدردشة لشرح بعض الأسئلة الصعبة، وأخيرا مقالات إرشادية عبارة عن نصايح لولي الأمر إزاي يتعامل مع ولاده ويحسن من مذاكرتهم وللطالب إزاي ينظم وقته.

كاتبة المقال:

أ.حنان سليمان (حساب الكاتبة علي تويتر)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s