اتعرف على “مافريكس”.. أول مدرسة للتعليم المدمج في مصر – مدونة خوجة

HeaderImage

بتدور على حضانة أو مدرسة لولادك السنة الجاية؟ إزاي هتختار؟ أكيد قرار مش سهل علشان تلاقي مدرسة فيها تعليم كويس لولادك بسعر مناسب إلى حد ما وموقعها قريب منك نسبيا، تعليم كويس يبني شخصيات وقيادات بكرة تنهض بالبلد وتنميها. تعليم ثنائي اللغة بيدرس لغة عربية ودين ولغات أجنبية مش المدارس الدولية اللي بقت بيزنس كبير بيستنفذ الأهالي ومش بالضرورة تكون بتقدم تعليم متميز وممكن تلاقي اللغة العربية وقعت في النص! القصور، زي ما بيشوفه ناس كتير، مش في المناهج لكن في طريقة التدريس.

من السنة الدراسية الجديدة.. سبتمبر الجاي يعني.. فيه مدرسة جديدة هتفتح أبوابها للأطفال في سن الحضانة ولحد رابعة ابتدائي للتدريس بطريقة مختلفة. “مافريكس” هي أول مدرسة للتعليم المدمج في مصر أو blended learning وده أسلوب تعليمي متطور معروف دوليا.

يعني ايه تعليم مدمج؟

يعني تعليم ممتع. يعني مفيش نوع تعليم واحد بيناسب كل الناس. يعني كل طفل بيحتاج عملية تعليمية متفصلة على مقاسه تناسب قدراته ومهاراته personalized learning. يعني الفصل مش المكان الوحيد للتعلم. يعني دروس حياتية. يعني الطفل مش بيتعلم من المدرس بس لكن كمان من زمايله في الفصل لما يتقسموا في مجموعات عمل ويشتغلوا مع بعض بعدين يعرضوا نتايجهم قدام الفصل. يعني أساليب وتكنيكات تفاعلية مختلفة في التدريس. يعني تعليم مش مقتصر على مسار أكاديمي لكن كمان تطوير فكري واجتماعي وشعوري. يعني فصول افتراضية وتعليم عن بعد. يعني كورسيرا وخان أكاديمي ومحتوى تعليمي إليكتروني. يعني أبحاث وعروض ومناقشات. يعني التابلت أداة تعليمية. يعني مدرسين مختلفين. يعني الطفل بيتعلم العناصر الرئيسية في أي اقتصاد قوي ومجتمع صحي زي العلوم والتكنولوجيا والهندسة والفنون والحساب STEAM من خلال مسابقات وألعاب ومشاريع جماعية وزيارات ميدانية لشركة زي زيروكس علشان الأطفال تشوف الطابعة ثلاثية الأبعاد 3D Printer بتشتغل إزاي أو لشركة BMW علشان يشوفوا مكونات العربية وكل قطعة مسئولة عن إيه وبتشتغل إزاي. يعني تفكير نقدي وحل مشاكل وإيجابية تفيد المجتمع. يعني طالب بيفيد مجتمعه لأنه حاسس بالمسئولية ناحيته. يعني مفيش واجبات منزلية. يعني طالب غير تقليدي.

المنهج أمريكي على معايير US Common Core Standards وMinnesota Standards. المعايير الأولى عبارة عن مبادرة تعليمية في أمريكا بتحدد مستوى التعليم اللي الطالب المفروض يكون حصله بنهاية كل سنة دراسية من الحضانة لحد الثانوي في اللغة الإنجليزية والفنون والحساب. معايير مينسوتا بتعمل نفس الشئ بالنسبة للإنجليزي والفنون والحساب بالإضافة للعلوم والدراسات الاجتماعية. المنهج كمان مطابق لمعايير وزارة التربية والتعليم المصرية. النظام التعليمي المعمول بيه معتمد من الجمعية الأمريكية للاعتماد الدولية American International Accreditation Association (AIAA).

فصول “مافريكس” عبارة عن 4 عناصر:

1- نيران المخيم Campfire: ودي مساحات معلوماتية فيها محاضرات وإرشادات مباشرة وشاشات لعرض الإرشادات دي إليكترونيا.

2- فتحة الري Watering hole: عبارة عن مساحة نقاشية أو حوارية بين الطلبة وبعضهم أو بينهم وبين المدرسين أو بينهم وبين طلبة تانيين بره مصر عن طريق برامج المحادثة بالفيديو. الانترنت متوفر في المساحات دي.

3- الكهف Cave: مساحات خيالية يقدر فيها الطلبة يفكروا ويطوروا مشروعاتهم.

4- الحياة Life: وهي الحيز وراء المدرسة. الحياة بشكل عام والدروس المستفادة في أي زيارات ميدانية أو مجتمعية لمكتب شركة أو مصنع أو مطبخ أو جنينة أو مدرسة تانية.

إيه الأثر المتوقع للتعليم المدمج على الأطفال؟

التجربة أثبتت إن نجاح النوع ده من التعليم أكبر بكتير من التعليم العادي التقليدي والدليل إن المدارس اللي بتشتغل بالنظام ده مركزها اتقدم في أمريكا مقارنة بالمدارس العادية حسب الدراسات. أما الطلبة فالدراسات بينت كمان إن مستواهم اتطور في الحساب عن زمايلهم في المدارس العادية، وده انعكس على شخصيتهم وإدالهم شعور بالفخر وزود ثقتهم بنفسهم علشان يبقوا أفراد فاعلين ليهم دور في مجتمعهم.

اختيار المدرسين بيتم إزاي؟

لازم يكونوا خبراء في تنمية الطفل أو عاملين دراسات عليا في التعليم. المهم يكونوا متمكنين من الوسائل التكنولوجية المختلفة وقادرين على زرع القيم والمواطنة وروح المبادرة ويدربوهم على مهارات مختلفة يعني من الآخر دورهم مش مقتصر على تعليم المنهج وخلاص. ممكن يكونوا أجانب أو مصريين.

مين الفريق ورا “مافريكس”؟

سيف أبو زيد وعلياء سعيد. سيف كان المدير التنفيذي لـ”أكاديمية التحرير” وهي مؤسسة تعليمية غير هادفة للربح قدمت طريقة مختلفة للتعليم المعتاد عن طريق الفيديو قبل ما يعلن سيف إغلاقها بسبب تحديات حكومية. سيف حاليا بيحضر ماجيستير في السياسات العامة في تخصص التعليم المدمج بالجامعة الأمريكية. أما علياء فكانت بتشتغل في “ياهو” وليها خبرة في التسويق أونلاين.

علياء قالت لنا: هنبدأ المدرسة بفرعين في 6 أكتوبر والقطامية كل فرع هيتقبل 100 طفل متقسمين على 5 فصول. عدد المدرسين الإجمالي هيكون بين 10-15 مدرس وفي كل فصل فيه مدرس وميسر facilitator يساعد المدرس وبيتأكد إن كل طالب متابع بشكل كويس ومش متأخر في التحصيل عن زمايله وبيتعلم المهارات الخاصة بكل نشاط.

مصاريف السنة الدراسية لسه مش معلنة بشكل نهائي لكنها في المتوسط هتكون 20 ألف جنيه. بالمقارنة مع المدارس الدولية، هتلاقي فرق كبير لصالح “مافريكس”. السبب؟ “التعليم نفسه مش غالي. اللي بيغلي المصاريف هو المبنى الموجود في موقع كويس الخ وبالتالي لما شاركنا مدارس “فيوتشر” وخدنا مبنى مستقل بينا لكن في نفس المكان.. التكلفة قلت”، زي ما شرحت علياء.

تقدر تعمل جولة في “مافريكس” وتشوف اليوم الدراسي هيمشي إزاي. ولو عجبتك المدرسة، املا الاستمارة وقدم لطفلك. 

كاتبة المقال:

أ.حنان سليمان (حساب الكاتبة علي تويتر)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s