مش هنبالغ لو قلنا إن دي أول مرة يجتمع فيها مئات المهتمين والمشتغلين بالتعليم والإبداع والتكنولوجيا على مدار يومين علشان يناقشوا تجارب وأفكار في تطوير أساليب التعليم في مصر. فرصة هايلة للتعارف والتشبيك مع رواد أعمال ومستثمرين ومدرسين وتربويين وباحثين وجامعات ومراكز تعليمية للتعلم والابتكار بتقدمها قمة “إيديوفيشن” Eduvation في الأول والتاني من إبريل في الجريك كامبس (الحرم اليوناني للجامعة الأمريكية سابقا) في وسط البلد.
بعض الموضوعات المطروحة للنقاش خلال ورش عمل وحوارات ومحاضرات وجلسات نقاشية التعليم عن بعد والتعليم المفتوح والتعليم التعاوني أو التشاركي وأساليب تعلم ذكية وإدارة المعرفة ونظام التعليم التفاعلي والفصل الافتراضي. من ضمن المتحدثين في القمة ماري بشاي، صاحبة الخبرة في نظام المونتسوري التعليمي ومؤسسة المركز المصري للمونتسوري. تابعوا موقع قمة “إيديوفيشن” علشان تعرفوا أكتر عن المتحدثين وخلي بالكم إن القايمة بيتم تحديثها ولسه مش نهائية.
القمة من تنظيم شركة iedyou وهي شركة اتأسست في 2015 بهدف دمج التعليم والتكنولوجيا وتطوير الطرق التعليمية من الروضة للدراسات العليا. من الشركاء هيئة تنمية صناعة تكنولوجيا المعلومات وجايزة هولت Hult Prize، وهي من أكبر المسابقات الطلابية في العالم للفوز بتمويل لمشروع ناشئ، وجامعة عين شمس وجامعة أسيوط.
مدونة “خوجة” راعي إعلامي لقمة “إيديوفيشن”. يعني هننقل لكم اللي هيحصل في اليومين. لكن نحب كمان نشوفكم هناك 🙂 تقدروا تحجزوا تذكرتكم بالتواصل مع المنظمين على صفحة الإيفنت على فيسبوك. 1 و2 إبريل متنسوش.. مستنيينكم 🙂
كاتبة المقال:
أ.حنان سليمان (حساب الكاتبة علي تويتر)
