تعرف على 3 مقاييس لجودة التعليم في المدارس (2-3) – مدونة خوجة

Quality of Education

المقال ده هو الجزء الثاني من سلسلة مقالات عن جودة التعليم
(الجزء الأول هنا)(الجزء الثالث هنا)

بعد ما عرضنا يعني ايه جودة تعليم في المقال السابق، هنعرض دلوقتي أهم الاختبارات والمقاييس العالمية في جودة التعليم في المدارس زي “بيزا” و”تيمز” و”بيرلز”. مهم إننا نعرف إن المشاركة في المقاييس العالمية دي بيكلف الدولة آلاف الدولارات كل سنة وعليه المفروض نشوفها باعتبارها اختبار لسياساتنا التعليمية والمنظومة اللي وضعتها الدولة للتعليم علشان تحكم بنجاحها أو فشلها فيتم الإصلاح والتعديل. تعالوا نتعرف إزاي العالم بيقيس جودة التعليم في المدارس:

1. البرنامج الدولي لتقييم الطلبة (بيزا)

(Programme for International Student Assessment (PISA

مين عمله؟ تابع لمنظمة التعاون الاقتصادي والتنمية OECD.

بيقيس ايه؟ بيقيس فيهم قدرات الشباب دول في القراية والحساب والعلوم غير المعتمدة على الحفظ من خلال أسئلة مفتوحة وأسئلة اختيارية. في القراية مثلا، الامتحان بيختبر قدرة الطالب على قراية تعليمات وإرشادات مكتوبة في ورق حكومي أو قراية الجرايد والكتب. القراية هنا مش بمعنى الإدراك لكن الفهم وربط المسائل ببعضها والقدرة على الخروج باستنتاجات. من الآخر، هو بيقيس حجم ونوع التعليم اللي المفروض يكون حصله الطالب خلال سنوات دراسته.

بيستهدف مين؟ الشباب الصغير اللي في سن 15 سنة على الاندماج في المجتمع. اشمعنى 15 سنة؟ علشان ده السن اللي تقريبا بيكونوا خلصوا فيه مرحلة المدرسة وداخلين على الجامعة وبالتالي وقت مناسب لقياس اذا القدرة الفعلية للطالب على استعمال اللي اتعلمه في المدرسة في حياته العملية.

خلفية: ظهرت فكرته في التسعينيات بقرار من الدول الأعضاء في المنظمة وعددها 34 دولة. أول امتحان “بيزا” اتعمل سنة 2000 ومن ساعتها بيتعمل كل 3 سنين لمدة ساعتين.

في إعلان النتايج، مبيتقالش إن السياسات التعليمية الفلانية هي اللي تسببت في نتيجة سلبية ما، لكن بتتقدم مقارنة بين الأنظمة التعليمية المختلفة في الدول وبتقدر تشوف إزاي النتايج متباينة ما بينها. المحللين بيشوفوا أهم سمات السياسة التعليمية في الدول الأعلى ترتيبا أو الأنجح تعليما: هل مثلا المدرسين بيتقاضوا مرتبات كويسة؟ حجم الفصول صغير ولا كبير؟ مين بيحط المنهج إدارة مركزية ولا الموضوع اختياري حسب كل مدرسة؟ بمجرد ما يظهر “بروفايل” تعليمي خاص بيوضح أهم مميزات الدولة اللي نظام تعليمها ناجح، الدول التانية تقدر تاخده نموذج تحاول تقلده.

الترتيب في “بيزا” مش بس بيعتمد على إن الطلاب يجيبوا أرقام عالية في الامتحان لكن كمان إن كل الطلاب في الدولة اللي خضعوا للامتحان يكون تعليمهم في نفس المستوى وتقديراتهم في امتحان “بيزا” متكونش متباينة نتيجة لاختلافاتهم في العرق أو النوع أو المستوى الاقتصادي وغيرهم.

مشاركة عربية: 70 دولة شاركت لحد دلوقتي في 6 امتحانات “بيزا” منهم 6 دول عربية زي الجزائر وقطر والأردن ولبنان وتونس والإمارات وإقليميا تركيا واسرائيل. في 2012، شارك 510 ألف طالب من 65 دولة في امتحانات “بيزا” ممثلين لحوالي 28 مليون شخص في العالم عنده 15 سنة وقتها. تقدر تشوف تقديرات الدول العربية في امتحانات “بيزا” هنا.

مراجع:

About PISA

نتائج امتحانات “بيزا” كلها

آخر امتحان “بيزا” منشور لعام 2012


2. مقياس الاتجاهات في الدراسة العالمية للرياضيات والعلوم (تيمز)

(Trends in International Mathematics and Science Study (TIMSS

مين عمله؟ تابع للجمعية العالمية لتقييم الإنجازات التعليمية IEA وبيديره المركز الوطني لإحصاءات التعليم التابع لوزارة التعليم الأمريكية.

بيقيس ايه؟ بيقيس إنجاز الطلاب في الحساب والعلوم ويقارنهم في أمريكا والدول التانية.

بيستهدف مين؟ طلاب الصف الرابع (رابعة إبتدائي) لحد الصف التامن (تانية إعدادي) مع مشاركات لطلاب ثانوي أحيانا.

خلفية: الامتحان بدأ في 1995 وبيتعمل من ساعتها كل 4 سنين. رغم إن المقياس الأمريكي يعتبر شبه حكومي، إلا إنه أكتر انتشارا في الدول العربية مقارنة بـ”بيزا”.

مشاركة عربية: 83 دولة شاركت في 6 امتحانات “تيمز” لحد دلوقتي منهم 15 دولة عربية هي مصر والأردن والبحرين والجزائر والكويت ولبنان والمغرب والسعودية وسلطنة عمان وفلسطين وقطر وسوريا وتونس والإمارات واليمن وإقليميا إيران وتركيا واسرائيل.

مراجع:

امتحانات “تيمز” حسب الصف الدراسي للطالب

امتحانات “تيمز” حسب السنة بالنسبة للحساب والعلوم

Trends in International Mathematics and Science Study

TIMSS 2015 Assessment Frameworks


3. الدراسة الدولية لقياس مدى تقدم القراءة في العالم (بيرلز)

(Progress in International Reading Literacy Study (PIRLS

مين عمله؟ تابع للجمعية العالمية لتقييم الإنجازات التعليمية IEA وبيديره المركز الوطني لإحصاءات التعليم التابع لوزارة التعليم الأمريكية.

بيقيس ايه؟ القدرة على القراية الصحيحة واكتساب واستخدام المعلومات وكمان الفهم وتفسير النصوص ودمج الأفكار وتقييم المحتوى وعناصره.

بيستهدف مين؟ طلبة الصف الرابع (الإبتدائي).

خلفية: الامتحان بدأ في 2001 وبيتعمل كل 5 سنين من ساعتها. في 2016، هيبدأ مقياس جديد اسمه ePIRLS لقياس القراية الإليكترونية بنفس معايير مقياس PIRLS للقراية العادية.

مشاركة عربية: 60 دولة شاركت في 4 امتحانات “بيرلز” لحد دلوقتي منهم 8 دول عربية هي مصر والبحرين وسلطنة عمان والمغرب والكويت وقطر والسعودية والإمارات وإقليميا إيران واسرائيل.

مراجع:

النتايج الدولية لامتحان “بيرلز” 2011

PIRLS 2016 Assessment Framework, 2nd Edition

ePIRLS

برنامج خاص لتحليل بيانات “تيمز” و”بيرلز”

في المقال الجاي، هنشوف الدول العربية المشاركة في المقاييس التلاتة حالها ايه..

 

كاتبة المقال:

أ.حنان سليمان (حساب الكاتبة علي تويتر)

مصادر الصور:

Google Images

flickr.com / License

Getty Images

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s