يعني ايه جودة التعليم؟ (1-3) – مدونة خوجة

Quality of Education

المقال ده هو الجزء الأول من سلسلة مقالات عن جودة التعليم
(الجزء الثاني هنا)(الجزء الثالث هنا)

كتير بنسمع إن مصر احتلت المركز مش عارف كام في مقياس ما لجودة التعليم. دايما بيكون المركز متدني وغالبا مبنكونش عارفين على أساس ايه خدنا المركز ده ولا ايه المعايير اللي تم القياس على أساسها. جودة التعليم هي في الحقيقة عبارة مطاطة بتتقال كتير للتعبير عن تطوير التعليم من غير ما يكون معناها متفق عليه في منطقتنا احنا من العالم. فيه مقاييس عالمية كتير لقياس جودة التعليم والمقارنة بين الدول لكن مهم نعرف المقاييس دي بتقيس ايه وعلى أساس ايه علشان نقدر نطور ويمكن نعمل مقياس خاص بينا على المستوى القومي اذا كنا فعلا جادين في تطوير التعليم. سنة 2000، منظمة الأمم المتحدة للطفولة “اليونيسيف” قدمت ورقة عمل لاجتماع المجموعة الدولية العاملة في التعليم في إيطاليا وشرحت بالتفصيل معايير جودة التعليم اللي يجب على أي مقاييس دولية الاعتماد عليها في التقييم واللي بنعرضها هنا وبعدها هنعرض أهم المقاييس العالمية في جودة التعليم ومعاييرها الخاصة.

حسب ورقة “اليونيسيف”، فيه خمس معايير بيحكموا جودة المنظومة التعليمية وهما:

1- المتعلمين

المدارس بتشتغل على الأطفال اللي بيدخلوها وجودة حياة الأطفال دول قبل دخولهم المدارس بيأثر بشكل كبير على تصنيفهم في العملية التعليمية وسرعة تلقيهم للعلم. زي ايه؟

1) الصحة العامة والتغذية الجيدة

لازم يكون الطفل جسديا ونفسيا في صحة كويسة. الاهتمام بصحة الطفل في مراحل الطفولة المبكرة خصوصا في أول 3 سنوات من حياته بيلعب دور مهم في بناء حياة صحية سليمة وتجربة تعليمية ناجحة في المدرسة. التغذية الكويسة مهمة لنمو المخ في السنوات المبكرة من عمر الطفل وكمان منع الإصابات والأمراض عن طريق الوقاية بيساعد الطفل إنه يكون متعلم جيد. أي مرض أو تأخر لو تم اكتشافه مبكرا بتبقى معالجته أسهل وتأثيره السلبي على تعليم الطفل بيكون محدود.

2) التجارب النفسية والاجتماعية في الطفولة المبكرة

إشراك الطفل في برامج تطور من قدراته وهو في مراحل مبكرة من حياته بيساعد على نمو شخصيته بشكل إيجابي ونمو عقله وسلوكياته ومشاعره. في الفترة دي من حياة الطفل اللي هي قبل دخوله المدرسة، مهم جدا إنه ميتعرضش لأي ضغوطات تأثر على نفسيته بعد كده.

3) الانتظام في الدراسة

لما ييجي وقت المدرسة، لازم الطفل يتعلم بشكل منتظم مش متقطع لأن تعرضه للمناهج بيشكل فرصة للتعلم والفرصة دي في حد ذاتها بتأثر على حجم إنجازه.

4) دعم الأسرة

كل ما كان مستوى تعليم الآباء كويس، كانت فرصة أطفالهم في التعلم والتفوق أفضل فهيقدروا يساعدوهم في المذاكرة ومستواهم المادي هيكون معقول وحتى لو واجهوا تحديات مش هيكون إخراج أطفالهم من المدارس اختيار مطروح.

2- بيئة التعلم

عشان تكون بيئة حاضنة ومشجعة بجد على التعليم لازم يتوفر فيها إمكانيات مادية وعناصر نفسية واجتماعية. زي ايه؟

1) جودة إمكانيات المدرسة

مباني حديثة نسبيا ومباني معدة ومجهزة جيدا وأماكن تجمع مفتوحة. تأثير الإمكانيات دي على عملية التعلم بيكون بطريقة غير مباشرة يعني صعب قياسها.

2) التفاعل بين البنية التحتية للمدرسة وأبعاد تانية للجودة

جودة مباني المدرسة يمكن ربطها بمسائل تانية متعلقة بالجودة زي وجود مواد وكتب تعليمية مناسبة، ظروف عمل كويسة بالنسبة للطلاب والمدرسين، قدرة المدرسين على اتباع طرق إرشادية معينة، توفر المعامل، وجود مياه نظيفة، صيانة الفصول، وجود المساحات الفارغة وغيرها.

3) حجم الفصل

بعض الدول كبرت حجم فصول التعليم الأساسي أو الابتدائي في التسعينيات مع عدم قدرتها على مواكبة النمو الحاصل في أعداد الطلاب ببناء مدارس جديدة. تضخم الفصول بيصعب مهمة المدرس ومهما كانت كفاءته، مش هيقدر يتأكد من استيعاب كل طفل في الفصل.

4) بيئة آمنة سلمية خصوصا للبنات

عدم التمييز بين الولاد والبنات مهم في المدارس لكن كمان مهم إن الرحلة للمدرسة تكون آمنة بالنسبة للبنات ميتعرضوش فيها لأي خطر أو تهديد من تحرش أو خطف أو اعتداءات من أي نوع سواء في الشارع أو المواصلات. السلامة الشخصية مهمة جدا.

5) سلوكيات المدرسين اللي بتأثر على السلامة

زي المدرسين اللي بيتخذوا الضرب وسيلة للتعليم أو المدرسين الرجال اللي ممكن يتحرشوا بطالبات عندهم في الفصل.

6) سياسات الانضباط الفعالة في المدارس

وضع سياسات وقواعد عامة مفهومة وواضحة للجميع من مدرسين وإداريين وطلاب بينظم إطار العلاقات والتعامل داخل المدرسة.

7) بيئات شاملة وغير طاردة

مهم إن الأطفال كلهم رغم اختلافاتهم يحسوا إن مدرستهم زي بيتهم محدش بيضطهدهم أو بيستبعدهم لسبب متعلق بالدين أو اللهجة أو النوع أو المستوى الاجتماعي أو الحالة الصحية (في حال كان الطالب عنده إعاقة أو مرض ما). 

8) اللاعنف

أي شكل من أشكال الصراعات الواضحة زي الحروب وغيرها بتأثر على صحة الطفل النفسية وقدرته على التعلم وده علشان التأثير ممكن يدوم معاه للأبد سواء كان تأثير جسدي أو نفسي أو سلوكي.

9) تقديم الخدمات الصحية

3- المحتوى التعليمي

ازاي تكون المناهج ذات جودة؟ بإنها تكون وضعت على أساس معايير بتركز على الطالب ومفيهاش تمييز على أساس ديني أو عرقي أو اقتصادي أو نوعي أو بأي شكل تاني وبتغرس قيم وطنية في الطفل. بإنها تعلم الطفل بجد وتمحي أميته وتعلمه الأعداد والأرقام ومهارات حياتية من صحة ونظافة وإتيكيت ومهارات صوتية. إنها تعلمه كمان السلام وتساعده على منع وقوع صراعات وإنه يحل النزاعات بشكل سلمي.

4- عملية التعليم

إزاي بيشكل المدرسين والإداريين مع بعض تجارب التعلم بالنسبة للطلاب، فتأهيل وجاهزية المدرسين وتنافسيتهم واستمرارهم في تطوير مهاراتهم والتقدم مهنيا وفهمهم للطفل وأساليب وطرق التدريس الحديثة المعتمدة على إشراك الطفل بحيث العملية التعليمية متكونش شغالة في اتجاه واحد من المدرس للطالب. أما بالنسبة للإداريين، فدعمهم وقيادتهم مهمة من حيث توفير الموارد اللازمة لإنجاح العملية التعليمية وتوفير الأدوات التكنولوجية الحديثة لدعم العملية التعليمية وإحداث تنوع في الإمكانيات المتوفرة في المدرسة علشان تكون التجربة التعليمية ثرية للأطفال.

5- النتايج والمخرجات

محو أمية الأطفال وتعليمهم الأعداد واكتساب الأطفال الثقة بالنفس وغيرها من المهارات الحياتية والمشاركة في مجتمعهم الصغير (المدرسة) والتمتع بصحة جيدة.

استنونا في مقالات جاية هنعرض مقاييس عالمية في جودة التعليم زي البرنامج الدولي لتقييم الطلبة PISA والاتجاهات في الدراسة العالمية للرياضيات والعلوم TIMSS والدراسة الدولية لقياس مدى تقدم القراءة في العالم PIRLS. وكمان هنشوف الدول العربية واقفة فين في المقاييس دي.

مراجع:

1- Defining Quality in Education

كاتبة المقال:

أ.حنان سليمان (حساب الكاتبة علي تويتر)

مصادر الصور:

Google Images

flickr.com / License

Getty Images

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s