ديسلكسيا.. إرشادات للآباء والمدرسين اقتداءً بالمشاهير (2-3) – مدونة خوجة

Dyslexia

المقال ده هو الجزء الثالث من سلسلة مقالات عن الديسلكسيا
(ده الجزء الأول) (ده الجزء الثالث)

مفيش حد بيتولد عارف يقرا. كلنا بنتعلم إزاي نقرا. ولما بنتعلم، مبنقراش كلنا بنفس السرعة.

اتعرفنا في الجزء الأول من مقالاتنا عن حالة ديسلكسيا وأسباب حدوثها وأعراضها، ودلوقتي هنعرف إزاي يتعامل الآباء في البيت مع أولادهم اللي عندهم ديسلكسيا وإزاي كمان يتعلموا في المدارس بشكل يناسب وضعهم من خلال بعض الإرشادات للمدرسين في طريقة التدريس ووضع المناهج.

بالنسبة للأب:

1- عادة هتلاقي الطفل راجع من المدرسة هلكان وتعبان أكتر من زمايله لأنه بيبذل مجهود أكتر في الفهم.

2- القراية لطفلك أو مساعدته في القراية هتزود مهاراته وتساعده يقرا لنفسه بعد كده. اقراله قصص أطفال وكارتون أو مجلات.

3- استعمل الكتب الصوتية.

4- اعمل جدول للمهام اللي المفروض الطفل يعملها واخلق “روتين” يسهل عليه متابعته وتنفيذ اللي فيه بشكل يومي.

5- رتب أوراق وكتب الطفل بشكل معين وفهمه النظام علشان يعرف يجيب الحاجة اللي بيدور عليها كل ما يعوزها ويقدر يرجعها مكانها.

6- استعمل أوراق صغيرة لتذكير الطفل بحاجات إنت عايزه يعملها وحطها على مكتبه.

7- اتصاحب على مدرسين المدرسة اللي ابنك أو بنتك في فصلهم. افتكر كويس إن المدرس في صفك وإنكم انتوا الاتنين هدفكم واحد وهو تقدم الطفل. الرحلة طويلة وعشان كده انت محتاج شريك يعامل الطفل في المدرسة بنفس الرعاية اللي انت بتعامله بيها في البيت. يمكن كمان يكون فيه حاجة لمعالج نفسي.

8- اقرا كتير عن الديسلكسيا علشان تعرف طفلك أكتر ودور له دايما على ألعاب وأدوات يقدر يطور بيها مهاراته.

9- لو ملقتش مدرسة تقدر حالة طفلك، فكر في التعليم المنزلي يمكن يكون حل. دي بعض المواد الدراسية اللي بيدرسها الأطفال اللي عندهم ديسلكسيا بره وهنا هتلاقي منهج كامل لكن كلهم بالإنجليزي. في الجزء التالت من مقالاتنا هنذكر بعض الجمعيات والمنظمات المهتمة بالديسلكسيا في العالم العربي واللي تقدر تتواصل معاهم لاختيارات أفضل بالنسبة لتعليم طفلك.

10- شجع طفلك على بذل المجهود مش على النتيجة. شوف ايه اللي بيحبه وعزز ثقته بنفسه عن طريق الهوايات اللي بيحبها.

من مؤتمرات تيد إكس: التغلب على ديسلكسيا وإيجاد الشغف

بالنسبة للمدرس:

1- افهم الحالة بالظبط عن طريق مصادر كتيرة للمعرفة أونلاين علشان تتسوعب وضع الطفل. متفتكروش مش مهتم أو مش عايز يتعلم علشان متأخر عن زمايله في تنفيذ تعليماتك فتفكر هتعاقبه إزاي.

2- ابدأ الحصة بعرض مبسط للدرس قبل شرحه وفي النهاية اعمل ملخص سريع للي ناقشتوه في الحصة لتنشيط ذاكرة الطفل.

3- اتأكد إن الطفل كتب الواجب اللي هيعمله في البيت بشكل واضح وإنه معاه الكتب والأوراق اللازمة.

4- اتأكد إن الطفل معاه رقم اتنين من زمايله في الفصل يقدر يكلمهم يسألهم في الواجب لو وقف معاه حاجة علشان يحس إنه مش لوحده.

5- خلي الطفل يقعد في مكان مناسب في الفصل بحيث تقدر توصله بسهولة كل شوية تتأكد إنه متابع معاك وشجعه دايما على المشاركة.

6- اكتب على السبورة بخط كبير واضح وراعي المسافات، واستعمل طباشير ملون علشان تسهل علي الطفل استيعاب المعلومة بفروق بصرية واضحة.

7- خلي نطقك واضح للكلام واستعمل مفردات بسيطة سهل عليه فهمها وكرر المعلومة وتجنب الأسئلة المعقدة أو المتداخلة.

8- متحرجش الطفل وتطلب منه يقرا بصوت عالي قدام الفصل لكن في نفس الوقت دربه على ده بينك وبينه. أكيد مش هيحب يحس بالضعف أو إنه أقل من زمايله.

9- شجع الطفل يستعمل الآلة الحاسبة.

10- اخلق بيئة مساعدة على التعلم مفيهاش تشويش وراعي إن الطفل اللي عنده ديسلكسيا هياخد وقت أكتر من زمايله لإنجاز أي تمرين.

كانت أيامي في المدرسة محبطة، ليس شعورا جميلا أن يكون الإنسان منبوذا وأن يظل في الصفوف الخلفية عند بداية السباق


ونستون تشرشل، رئيس الوزراء البريطاني الأسبق، يصف شعوره لإصابته بالديسلكسيا.

 

لو طفلك متأخر في بعض الحاجات فهو متفوق في حاجات تانية قصادها. الشخصيات اللي جاية كلها عندها ديسلكسيا وكلهم ناجحين وأساميهم معروفة في العالم في مجالات مختلفة:

– جينيفز أنيستون وسيلفستر ستالوني وتوم كروز وأنتوني هوبكنز وسلمى حايك أورلاندو بلوم وجيم كاري وكيانو ريفز في الممثلين.

– توماس إيديسون وألبرت أينشتاين وجراهام بل في العلماء.

– ليوناردو دافنشي في الرسامين.

– شير وجاستن تيمبرليك في المغنيين.

– محمد علي في الرياضيين.

– جورج واشنطن وونستون تشرشل في الرؤوساء ورجال الدولة.

– هنري فورد وستيف جوبز في رجال الأعمال.

– أجاثا كريستي في الكتاب.

– والت ديزني وستيفن سبيلبرج في المخرجين.

لو عايز تعرف بقية القايمة، اقرا هنا.

استنونا في الجزء التالت والأخير من سلسلة “ديسلكسيا” علشان نتعرف على الجمعيات والمنظمات المختلفة في العالم العربي المعنية بالحالات دي وعلى مؤتمرات وكتب ووثائقيات وتطبيقات على التليفون تساعدك في التعرف أكتر على ديسلكسيا وتوصلك بألعاب مسلية لطفل  ممكن يكون ليه مستقبل كبير زي الأسامي اللي ذكرناها فوق لو اتوجدت الإرادة. استنونا 🙂

 

كاتبة المقال:

أ.حنان سليمان (حساب الكاتبة علي تويتر)

مصادر الصور:

Google Images

flickr.com / License

Getty Images

المراجع:

1- A Dyslexic Child in the Classroom

2- ما هو عسر القراءة – الديسلكسيا – ؟ مظاهره؟ أسبابه؟ وعلاجه؟

3- Understanding Dyslexia

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s