إزاي تطور القدرات الحسابية لطفلك بإستخدام أباكس؟ – مدونة خوجة

abacus-girl

هل ممكن الحساب يبقى عملية ممتعة؟

هل ينفع الأطفال يتعاملوا مع مسائل الجمع والطرح والضرب والقسمة على إنها لعبة مسلية مش معقدة ومملة؟

هل نقدر نعودهم على استعمال مخهم بدل الآلة الحاسبة في المسائل الرياضية؟

ممكن في حالة اذا مقتصرتش العملية الحسابية على الأرقام وزودنالها عناصر بصرية جذابة.

زي ما الرياضة مهمة علشان تتمرن وتحسن قدراتك الجسمانية، المخ كمان بيحتاج تمارين علشان يفضل شغال بنشاط وتركيز وخلاياه تستمر في النمو. الرياضيات بتعتبر أفضل تمرين للمخ لأنها مسائل حسابية بتعتمد على المنطق في حل مشكلة محددة. الأبحاث بتقول إن كل ما الشخص قضى وقت أكتر في المسائل الحسابية كل ما زادت قدراته العقلية وزاد تركيزه وبقى يفكر بشكل أفضل، لكن المشكلة إن الطفل بيتجنب العمليات المعقدة وبيهرب من العمليات الحسابية.. فإزاي نحببه في الحساب؟ هنا بييجي دور العداد الصيني أباكس Abacus.

أباكس هو عداد بيشبه أداة أو وسيلة أو لعبة قديمة جدا بتساعد في الاستمتاع بالحساب عن طريق لوح خشبي فيه أسلاك متوازية وعليها أحجار أو خرز ملون أو قطع خشبية دائرية بيتم تحريكها في محيط اللوح المستطيل وهو إطار اللعبة وبتكرار الاستخدام، بتساعد الطفل على تصور العملية الحسابية في مخه من غير ما يرجع للعداد.

إزاي تستعمل العداد الصيني Abacus؟

الشكل البدائي المعتاد لعداد أباكس بيكون صفين أفقيين فيهم حلقات؛ كل حلقة في الصف العلوي بتساوي خمسة وكل حلقة في الصف السفلي بتساوي واحد. مع الوقت، تقدر تعدل قيمة الحلقات لعمل مسائل حسابية معقدة أكتر فيها أرقام كبيرة زي ملايين أو مليارات أو كسور أو نسب أو فيها أعداد عشرية أو جذر تربيعي الخ. في الآخر، انت اللي بتحط قواعد اللعبة وما تساويه كل حلقة. خُد مثل في الصورة دي:

abacus_1_riLnCK6

الطفل من سن 5-12 سنة بتكون خلايا مخه سهل تشكيلها حسب المثيرات والمحفزات اللي بيتعرض لها في بيئته. أباكس مش بس بيساعد الطفل على حل المسائل الحسابية لكن كمان بيحسن أداؤه التعليمي بشكل عام لأنه بيحسن أربع احتياجات أساسية هي العقل المدبر أو الموجه أو ما يسمى Mastermind والذاكرة والتركيز والثقة بالنفس. وكل ما زادت قدرته على حل المسائل في مخه كل ما زادت ثقته بنفسه وزادت قدرته على تحدي زمايله وزادت رغبته في النجاح والتفوق وبالتالي كفاءته بقت أعلى وإجاباته بقت دقيقة بشكل كبير. بعض الدراسات بتقول كمان إن الطفل اللي اتعلم بعداد أباكس بيقدر يحل العمليات الحسابية أسرع من الآلة الحاسبة 4 أو 5 مرات وده لأن مخه بيترجم الأرقام لصور علشان يحلها بشكل أسرع وفي نفس الوقت وهو مستمتع.

مش لاقي العداد الصيني في بلدك؟ إعمل واحد بنفسك!

التدريب على أباكس له إيجابيات كتير فهو بينشط المخ وبيحسن كفاءته لأنه بيساعد على تنشيط النصف الأيسر من المخ المعني بالحساب والمنطق وكمان بينشط النصف الأيمن المعني بالتعرف على الوشوش والألوان والصور والموسيقى والقراية وهو كمان اللي بيتحكم في المشاعر والإبداع. كمان بيقوي الحسابات الذهنية وبيسرع عملية الحساب وبيحسن الذاكرة والقدرة على استيعاب المعلومات ويقوي التركيز ويزيد من الثقة بالنفس وبيزود الفكر المنطقي والتحليلي وبيحسن قدرات الكتابة والاستماع والقراءة من ناحية السرعة والاستيعاب وكمان بيحسن قدرات الخيال والتصور البصري والنتيجة في الآخر بتنعكس بإيجابية على مهاراته الحياتية ومستقبله الوظيفي. العداد ده بيعتبر مناسب جدا للمكفوفين كمان لأنه محسوسة بالنسبة لهم ويقدروا يشتغلوا بيه لكنه مفيد جدا للأطفال الأصحاء زي ما ذكرنا.

أباكس لتلاميذ الابتدائي

كتير من المؤسسات التعليمية في العالم بتستعمل أباكس ضمن المنهج الدراسي بتاعهم لتقوية المهارات الحسابية للأطفال من سن صغير. وتعتبر الصين واليابان والهند أكتر دول منتشر فيهم التعليم بعداد أباكس بنسخة مختلفة أو بشكل مختلف للعداد في كل دولة منهم. لكن بتعتبر الصين هي الأم وحاضنة جمعية عالمية اسمها WAAMA بتضم 50 أكاديمية عضو في العالم موزعة بين الدول وبتعمل مسابقات عالمية بين أعضاءها كل فترة.

أباكس في مدارس اليابان

في العالم العربي، فيه بعض البرامج اللي بتشتغل على الرياضيات الذهنية بنظام أباكس زي برنامج الخوارزمي الصغير و أكاديمية مواهب الدولية لتنمية ذكاء الأطفال.

الخوارزمي الصغير الرياضيات الذهنية للاطفال

ودلوقتي إلعب هنا و هنا شوية مع أباكس. وعلى تليفونك سواء كنت أندرويد أو آيفون، ابحث في التطبيقات بكلمة abacus علشان تطلعلك عشرات التطبيقات اللي تقدر تنزلها وتلعب فين ما كنت.

كاتبة المقال:

أ.حنان سليمان (حساب الكاتبة علي تويتر)

مصادر الصور:

Google Images

flickr.com / License

Getty Images

المراجع:

1- Abacus (Mental Math)

2- IQ Abacus. A mental math school

3- Mental Math Benefits

4- What are the benefits of Abacus training?

5- العداد الصيني أباكس وتنمية الذكاء الحسابي عند الأطفال

6- abacus-math

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s