ديسلكسيا.. قارئ بطئ ومفكر خارج الصندوق (1-3) – مدونة خوجة

Dyslexia

المقال ده هو الجزء الثالث من سلسلة مقالات عن الديسلكسيا
(ده الجزء الثاني) (ده الجزء الثالث)

مفيش حد بيتولد عارف يقرا. كلنا بنتعلم إزاي نقرا. ولما بنتعلم، مبنقراش كلنا بنفس السرعة.

“بيرسي ف.، 14 سنة، ولد ذكي سريع في الألعاب وميقلش عن زمايله في حاجة. مشكلته الكبيرة كانت وما زالت عدم قدرته على تعلم القراية”، ده كلام طبيب إنجليزي في دورية طبية بريطانية هي British Medical Journal في 1896. قبله بعشر سنوات، كان الطبيب الألماني رودولف برلين أطلق اسم “ديسلكسيا” Dyslexia على الحالة دي.

الأطباء اكتشفوا إن فيه ناس عندهم بطء في القراية رغم ذكاءهم الشديد وده مش بسبب عيب في المخ لكن عقلهم بياخد مدة أطول في استيعاب وربط الحروف اللي بتشوفها العين مع الأصوات اللي المفروض تطلع عند نطقها. مش معنى كده إن الشخص ده غير قادر على فهم المسائل المعقدة. هو بس بيحتاج وقت أطول لاستيعابها وحلها. وممكن يحتاج طريقة تانية لتوصيل المعلومة تناسبه أكتر زي مثلا إنه يسمع كتاب صوتي بدل قرايته أو إنه يبتكر حاجة في لحظتها لأن ذاكرته مبتبقاش قوية. علشان كده بنلاقي حالات ديسلكسيا كتير مبدعة ومبتكرة في مجالات الموسيقى والرسم والرياضة والفنون والحكي والتصميم هنتعرف عليهم في الجزء التاني من مقالنا.

علشان كده مكنش غريب إن جامعة ييل تربط بين الإبداع والدسلكسيا لما جت تعمل مركز تابع لكلية الطب فسمته مركز ييل للديسلكسيا والإبداع Yale Center for Dyslexia & Creativity ويكون شعاره “قارئ بطئ.. مفكر خارج الصندوق”. باختصار تخيل إن أصحاب ديسلكسيا هما سمك عايشين على الشجرة.. هل المكان هيناسبهم؟ لو حكمت على السمك إنهم فشلة علشان مش قادرين يعيشوا على الشجرة هيفضلوا فاكرين إنهم أغبياء لكن الحقيقة مش كده. ده بالظبط كان فكرة وعنوان كتاب لطيف عن ديسلكسيا.

شاهد: ما هو عسر القراءة؟

يعني ايه ديسلكسيا؟

كلمة “ديسلكسيا” أصلها يوناني مشتقة من كلمتين Dys وتعني غير طبيعي أو ضعيف وLexis وهي اللغة أو الكلمة المقروءة. أما الحالة دي فهي واحدة من مشاكل التعلم بالنسبة للأطفال لأنهم ممكن يفضلوا سنين من غير ما حد يكتشف الصعوبة اللي بيقابلوها في التعلم. ولحد ما يتم تشخيصهم بديسلكسيا، بيفضلوا يواجهوا انتقادات في المدرسة والبيت لأنهم “متأخرين” رغم الإرهاق اللي ممكن يظهر عليهم نتيجة الجهد المبذول في القراية والتحصيل ومحدش حاسس بيهم لأن عقولهم بتفكر بالصورة وبالإحساس أكتر من الكلمة والصوت. ديسلكسيا عادة بتعني تعثر في القراية لكن ممكن الاضطراب يكون كمان في الكتابة أو التحدث أو الهجاء.

من الطبيعي إن أي ضعف بيحس بيه الانسان بيأثر على ثقته بنفسه وبيخليه خايف يتحرج قدام الناس وممكن يتجنب التجمعات اللي ممكن تحطه في موقف يظهر فيه النقص اللي عنده. علشان كده مهم جدا نعزز ثقة اللي عندهم ديسلكسيا ومنحسسهمش إنهم أقل من الناس التانية ونشجعهم يكونوا ناس اجتماعيين مش انطوائيين. 

الدراسات بتقول إن أي مجتمع فيه 10% على الأقل عندهم ديسلكسيا باختلاف أنواعها ودرجاتها لكن بيبقى عندهم صعوبة تعلم. في أمريكا، أكثر من 2 مليون طالب من سن 3-21 سنة عندهم ديسلكسيا حسب وزارة التعليم في 2012 ومعظمهم عندهم مشاكل في القراية. ده عدد الحالات اللي قدروا يتعرفوا عليها لاحتياجاتهم التعليمية الخاصة لكن العدد الحقيقي أكبر من كده.

الأسباب والأعراض

أسباب ديسلكسيا مختلفة أهمها راجع للجينات؛ العلماء بيقولوا إن 40% من أبناء من تم تشخيصهم بديسلكسيا بيتنقل لهم صعوبة تعلم القراية. سبب تاني هو تركيبة المخ نفسه أو ما يعرف بالمنطقة الصدغية المسئولة عن فهم اللغة. الجزء ده يفترض يكون حجمه أكبر في نصف المخ المسيطر على الانسان (النصف الأيسر بالنسبة للشخص الأيمن) لكن في حالة ديسلكسيا بيكون حجمه واحد في نصفي المخ. سبب تالت هو طبيعة نشاط ووظائف المخ؛ يعني في حالات القراية العادية المخ بيقدر يفك رموز بيقراها ويحولها لأصوات لما تتجمع سوا تدي كلمات ليها دلالة وكل ده في عمليات تتابعية. ده مبيحصلش بنفس الدرجة من الوفاق في حالات ديسلكسيا، بل بالعكس كل العمليات اللي بتعتبر تلقائية أو بتحصل بشكل أوتوماتيكي في العادي بتاخد وقت في حالات ديسلكسيا.

شاهد: عسر القراءة

الإصابة بديسلكسيا ليها 3 أنواع رئيسية هي:

1) صعوبة في النطق نتيجة صعوبة تمييز الكلمات بناء على أصواتها عند نطقها.

2) صعوبة في السرعة والتسمية وفيه قراية بطيئة واستخدام كلمات بسيطة للغاية يفهمها المستمع بسهولة.

3) صعوبة في فهم ما قرئ.

أعراض ديسلكسيا كتير وبتختلف حسب المرحلة العمرية؛ فبالنسبة للأطفال مثلا في فترة الحضانة بيظهر عليهم صعوبة في التعرف على الحروف والخلط في أصوات حروف مفيش ارتباط بينها خالص أو أي وجه تشابه وكمان بتظهر أخطاء في نطق الكلمات وعد الأرقام وبتكون عندهم حصيلة قليلة من الكلمات اللي بيستعملوها. أما في المدرسة في المرحلتين الابتدائي والإعدادي، فبيكون فيه صعوبة في القراية والتهجئة والحساب وفي تذكر الأرقام والحقائق وفي استعمال قواعد اللغة بشكل سليم وتمييز الاتجاهات. في مرحلة الثانوي، بتظهر الصعوبة أكتر في القراية بصوت عالي وفي فهم النكت أو الأمثال وفي ادارة وتنظيم الوقت وتلخيص القصص وكمان في تعلم لغة جديدة.

ديسلكسيا مش مرض وبالتالي ملهوش علاج بمعنى إنه مش داء علشان يبقاله دواء، لكن مهم جدا التعرف عليه في بداية حياة الطفل علشان يتم التعامل معاه بالشكل المناسب. كل ما تم التعرف على ديسلكسيا مبكرا، كان أسهل التعامل معاها علشان الطفل ساعتها هيتعلم بشكل معين والبيت والمدرسة هيكونوا فاهمين احتياجاته وموفرينله البيئة المساعدة. غير كده، هيفضل يحس دايما إنه أقل من زمايله وإن عنده مشكلة بس مش عارف ايه هي. مهم كمان إن الطفل نفسه يفهم حالته. “آرثر” كارتون لطيف معمول للأطفال بيشرحلهم في شكل قصة يعني ايه دسلكسيا.

شاهد: ديسلكسيا في كارتون آرثر

في الجزء التاني من مقالاتنا عن ديسلكسيا، هننقل لكم ارشادات للآباء للتعامل مع حالات دسلكسيا في بيتهم وارشادات تانية للمدرسين اللي بيتعاملوا مع حالات دسلكسيا وكمان هنعرض قصص نجاح لمشاهير عندهم دسلكسيا. لحد ما ينزل المقال التاني اتفرجوا على الفيلم الوثائقي التالي واستنونا 🙂

شاهد: احتواء ديسلكسيا (وثائقي)

كاتبة المقال:

أ.حنان سليمان (حساب الكاتبة علي تويتر)

مصادر الصور:

Google Images

flickr.com / License

Getty Images

المراجع:

1- I Have Dyslexia. What Does it Mean?

2- Understanding Dyslexia

3- Four Things All Educators Should Understand About the Dyslexic Brain

4- Dyslexia

5- IDA Fact Sheets

6- Dyslexia International Report

7- 37 Common Characteristics of Dyslexia

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s