إيه سكراتش ده؟ – مدونة خوجة

 

البرمجة مش للكبار فقط …


يعني ايه سكراتش؟

مبدئياً سكراتش اللي حنحكي عنها باستفاضة في المقالة دي عبارة عن لغة برمجة رسومية موجهة بشكل رئيسي للمستخدمين المبتدئين وغير المختصين بالمجال، زي الأطفال أو حتى الكبار اللي بيستصعبوا فهم عالم البرمجة من خلال لغات البرمجة التانية الأكثر صعوبة وتعقيداً بطبيعة الحال. سكراتش متوفرة ضمن بيئة برمجية سهلة وبسيطة بتتيح للمتسخدمين دول التحكم بمجموعة وسائط مختلفة وكيفية تفاعلها مع بعضها.

تم تطوير برنامج سكراتش من قبل مجموعة (لايف لوج كيندرجارتن) في مختبر الوسائط بمعهد ماساتشوسيتس للتقنية (ام اي تي)، لإتاحة الفرصة للناس الغير مختصين بالمجال إنهم ينموا القدرات الإبداعية عندهم عن طريق تصميم ألعاب وقصص تفاعلية وروسوم متحركة من خلال لغة برمجة سكراتش البسيطة والمجانية للجميع.

الاسم بحد ذاته “سكراتش” تم اشتقاقه من الأساس من طريقة استعمال مشغلي الموسيقى لأقراص التسجيلات (السيديهات) اللي بيحركوها بإيديهم للأمام والخلف وبالتالي يقدروا يدمجوا المقاطع الموسيقية مع بعضها بطرق ابتكارية. وده اللي بيحصل تماماً في سكراتش، بحيث إن الأداة دي بتمكنك من القيام بنفس العملية وذلك عن طريق استخدام ودمج الوسائط المختلفة المتوفرة في البرنامج اللي قد تكون على شكل صور ومقاطع موسيقية ورسوم متحركة وأصوات معينة.

إيه هي فكرة سكراتش وأهميته ؟

بتقوم فكرة سكراتش على وجود عدة تصنيفات معينة بيندرج تحتها مئات المقاطع البرمجية اللي بتمكن الأطفال من صنع برامج وتطبيقات مختلفة، بحيث إن كل مقطع من المقاطع البرمجية دي بيؤدي مهمة محددة وسهلة، ولما المستخدم بيجرب يجمع كل المقاطع دي مع بعضها ويركبهم ضمن برنامج واحد بيحصل على تطبيق أكبر وأكثر تعقيد تبعاً للوظائف أو المهام اللي بيقوم بيها.

يعني مثلاً، الصورة اللي تحت دي بتشرح برنامج مكون من 3 خطوات، كل خطوة عبارة عن مقطع برمجي. شرح البرنامج هو الآتي:

القطعة الأولي عبارة عن شرط وهو: لما المستخدم يضغط علي الفارة، أما القطعة الثانية فهي اللي بيحصل لما الشرط يتحقق وهو إن الحاسب الآلي حيقول كلمة Hello، وبعد كده يتنفذ المقطع البرمجي الثالث وهو المسئول عن توقيف البرنامج، وبكده ينتهي البرنامج. 

Scratch3

مش كده وبس…

يمكّن سكراتش الأطفال بداخل البرنامج من إنشاء مشاريعهم باستخدام وسائط الأصوات والصور والفيديو وغيرها تصميم ألعابهم ورسومهم المتحركة على شكل قصص مشوقة ومثيرة بتحفزهم للتعلم والنهل أكثر من هذا العالم الواسع وإضافة التأثيرات المناسبة للوسائط المستخدمة؛ كل ده بيحصل عن طريق إدخال أدوات متحركة قابلة للبرمجة تعرف بـ “كائنات” واللي بتكون على شكل نصوص أو رسوم أو صور بيتم برمجتها على هيئة وحدات تعرف بـ “لبنات” قابلة للتحكم عن طريق الفأرة أو لوحة المفاتيح.

دور سكراتش في تعليم الناشئين مهارات تقنية وحياتية

هنا بتكمن أهمية برنامج سكراتش في كونه بيسمح للمستخدمين وتحديداً الأطفال منهم، إنهم يطلقوا العنان لإبداعاتهم وقدراتهم بحيث يقدروا يتعلموا ازاي يقوموا بإنشاء مشاريعهم التفاعلية وتصميم قصص من وحي خيالهم وتشكيل ألعابهم ورسوماتهم المتحركة بنفسهم، ويتركوا بصمتهم الخاصة من خلال البرنامج بأدواته البسيطة بعيداً عن تعقيدات البرمجة بالأكواد اللي ممكن تكون صعبة على عقول الأطفال في عمرهم اللي بيتراوح ما بين 8 إلى 15 سنة. مع العلم إنه قد يتمكن الاطفال في عمر أقل من ذلك من استخدام البرنامج ولكن بمساعدة أهاليهم أو المختصين بالمجال.

من خلال التطبيق العملي على البرنامج ده الأطفال بيتعلموا اكتساب عدة مهارات على الصعيد المهني والتقني، وأبرز المهارات دي كالتالي:

1. مهارات رياضية وبرمجية: من خلال سكراتش الأطفال بيتعلموا مفاهيم برمجية على اختلاف مستوياتها زي مفهوم التكرار ومفهوم الشروط، مروراً بمالمفاهيم الأكثر تعقيداً كاللبنات والكائنات، وصولاً إلى المهارات الرياضية كالإحداثيات والمتغيرات والأعداد العشوائية. وطبعاً هناك فارق كبير بين تعلم مهارات زي دي في إطار تقليدي متمثل بدورس الجبر الإعتيادية اللي غالباً لا تنشئ أي رابط شخصي بين الطفل وبين المفهوم اللي بيتعلمه وما بين تعلم المهارات في إطار محفز وشيق زي سكراتش، البرنامج اللي بيخلي الطفل فاهم معنى اللي هو بيعمله لما مثلاً يتحكم بسرعة الكائنات اللي بيستخدمها في تصميم مشروعه أو مراقبة نتائج بعض التأثيرات المضافة ليها.

2. مهارات التصميم: تتمثل المهارة دي بكون الطفل بيختار فكرة معينة حيشتغل عليها في مشروعه ويبتدي يطور لها نموذج أولي، وبعد كده يبدأ باختبار النموذج لإصلاح أو تعديل أي ثغرات وأخطاء بتظهر عند تشغيله، بالتزامن مع أخذ أي ملاحظات من الآخرين على المشروع، وبعد كده  مراجعته وإعادة تصميمه من جديد وفقاً لما استجد من أفكار وآراء.

3. ومن نقطة التصميم بتظهر لنا مهارات حياتية الطفل بيتعلمها في رحلته لتعلم البرمجة باستخدام سكراتش، اللي بيدرّب الأطفال المتعلمين على اكتساب مهارات تقنية وحياتية جديدة بيحتاجوها بدون شك في مستقبلهم وحياتهم العملية، منها مهارات البرمجة الأساسية المطلوبة في المجال ده زي التفكير الإبداعي والتواصل والتنظيم والتحليل للمستقبل ومهارات التعاون لتحقيق أهداف معينة والتعلم المستمر وكذلك مهارة حل المشكلات من خلال تفكيك الأجزاء الأكبر لأجزاء أصغر منها بسيطة وغير معقدة للوصول إلى حل المشكلة الأساسية.

4. الإحتراف التقني: أي إن البرمجة باستخدام سكراتش بتساعد الأطفال يتعلموا إنهم يتمتعوا بطلاقة وحرفية عالية في استخدام مخرجات هذا العصر من التقنيات الرقمية والبرامج الحديثة، للتعبير عن نفسهم من خلالها وعن طريق الإبداع والابتكار فيها ومش بس الإكتفاء بمعرفة التعامل معها بشكل سطحي أو مبدئي.

فكون الناشئة اللي زيهم بيتدربوا في العمر ده على مهارات زي دي باستخدام سكراتش اللي هو أشبه باللعبة أكثر منه كبرنامج، ده بحد ذاته بيساعدهم يتغلبوا على الحواجز اللي قد تكون موجودة في تفكيرهم عن البرمجة كحاجة معقدة وصعبة الفهم لتغييرها لتصبح طريقة تفكير يعملوا من خلالها بمستوى مبتدئ في سنهم المبكر، عشان لما يلتحقوا بالجامعات ويتخصصوا بالمجالات التقنية يكونوا أقدر إنهم يبدؤوا بمستوى متقدم ومراحل عليا من التخصص ده.

وده بيساعدهم على تطوير أنفسهم كمفكرين منطقيين، وبالتالي نضمن الحصول على مستقبل أفضل للكفاءات دي بفرص وظيفية جديدة، وكمان نكون حصلنا على مخرجات تعليمية بجودة عالية ومبرمجين متخصصين وخبراء في مجال اختصاصهم، فاهمين طريقة عمل التقنيات الحديثة اللي بتظهر كل يوم في حياتهم اليومية وبتصادفهم في كل مكان.

مصادر وروابط سريعة:

1. لتحميل أحدث نسخة من سكراتش

2. للبرمجة باستخدام سكراتش من خلال البيئة البرمجية المتوفرة على الموقع

3. للدخول إلى المنتدى الخاص بسكراتش لمشاركة ونشر أفكارك أوالاستفسار حول أي أسئلة خاصة باستخدام سكراتش أو الحصول على معلومات مفيدة في المجال لمساعدتك في إنشاء مشروعك

4. للدخول إلى الموسوعة الخاصة بسكراتش للحصول على مصادر مفتوحة في نفس المجال وآلاف البرامج الأخرى المقسمة تبعاً لنوع التطبيق لتلهمك أفكار جديدة لمشاريعك

5. الدليل المرجعي لتعليم الناشئة لغة سكراتش للتعرف إلى واجهة سكراتش ومكوناته عن قرب ودليل استخدامه
6. مصدر آخر لتعليم سكراتش
7. قوائم فيديوهات تعليمية تشرح موقع سكراتش باللغة العربية
ـــ القائمة الاولى ـــ القائمة الثانية ـــ القائمة الثالثة

 

قريباً إن شاء الله، إنتظروا مسابقات تعليمية علي مدونة خوجة بإستخدام لغة سكراتش..

يلّا .. إتعلموا سكراتش بسرعة عشان تقدروا تشاركوا وتكسبوا في المسابقات !!

 

كاتبة المقال:

أ.دانية سمحان (حساب الكاتبة علي تويتر / لينكدإن)

مصادر الصور:

Google Images

flickr.com / License

Getty Images

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s