30 طريقة مبتكرة لإستخدام تويتر في الفصل – مدونة خوجة

Twitter_Classroom

Edudemic

رابط المقال الأصلي

http://www.edudemic.com/the-30-newest-ways-to-use-twitter-in-the-classroom/

إنت بتستخدم تويتر في الفصل كجزء من خطة التدريس بتاعتك؟ مفيش مشكلة لو الإجابة لأ، إنت مش لوحدك. بالرغم من إن حوالي 80% من المدرسين في مراحل التعليم من الحضانة و لغاية التعليم الثانوي عندهم حساب علي تويتر، لأغراض شخصية أو مهنية، لكنهم مش بيستخدموا التغريدات في فصولهم الدراسية.

لأول وهلة، ممكن يكون صعب عليك إنك تفهم هو أنا ليه أصلاً أستخدم تويتر في التدريس، خصوصاً لو أكثر إستخدام معروف عن تويتر هو إنك تعرف آخر أخبار الدنيا عن أصحابك أو أسرتك أو المشاهير في المجتمع. لكن مع وجود 288 مليون مستخدم لتويتر في العالم، خبراء التعليم، زي مثلاً العاملين في الجمعية القومية للتعليم (في أمريكا)، بيقولوا إن تويتر ممكن يكون أداة للمدرسين اللي عايزين يزودوا حصيلة المعلومات و وسائل الإتصال و طرق التعاون، سواء داخل الفصل أو بره الفصل.

و بناءاً عليه، عملنا عملية مسح للإنترنت عشان نحدد إيه أحدث الطرق اللي بيستخدمها المدرسين البارعين في إستخدام التكنولوجيا عشان يحسنوا عملية التَعَلُّم بإستخدام تويتر.

إستخدام تويتر في قاعة الدرس

دي بعض الطرق المبتكرة اللي ممكن المدرسين و الطلبة يستخدموها لتبادل المعلومات في مجموعات خاصة علي تويتر:

1. أطلب من التلاميذ إنهم يكتبوا اللي إتعلموه (في يوم معين) في تغريدة. الممارسة دي بتدي الفرصة للطالب، أياً كان سنه، إنه يتفكر في اللي إتعلمه و يلخصه بشكل موجز.

2. عزز و ادعم السلوك الإيجابي للطلبة عن طريق مثلاً إنك تنقي حاجة كويسة أو تصرف كويس من طالب معين و تنشره في تغريدة، و بالتالي كل أعضاء المجموعة من التلاميذ يعرفوا عن التصرف ده و دعمك ليه.

3. أطلب من التلاميذ يكتبوا تغريدات يتخيلوا إن اللي قال التغريدات دي شخصيات من كتاب إنت بتقراه في الفصل. مثلاً إحنا بندرس قصة حياة شخص معين، في لحظة معينة خاصة جداً من القصة، ممكن تطلب منهم يكتبوا تغريدة ممكن يقولها صاحب القصة في اللحظة دي.

4. إخلق مع الطلبة قصة من التغريدات. إظهر لهم خط التغريدات علي الشاشة و شجعهم يضيفوا جملة للقصة مع توالي أحداثها.

5. إطرح علي الطلبة التحدي ده: مين يقدر يكتب قصة في حدود الــ 140 حروف بتوع تويتر؟ أو مين يقدر يكتب تغريدة لبداية القصة و تغريدة لمنتصف القصة و تغريدة لنهايتها؟

6. إستخدم تويتر للتصويت و إستطلاع الرأي. إسألهم عن رأيهم في أمر معين، وناقش معاهم النتايج. الطريقة دي بتؤدي إلي مشاركة أكبر من الطلبة في نشاطات الفصل و ده ممكن يؤدي إلي إنخراط أكبر في العملية التعليمية.

7. أطلب من الطلبة يخلقوا شخصيات من الدرس اللي إنت بتقوله، و لنفرض إنه درس تاريخ مثلاً، و يتخيلوا حوار بين الشخصيات دي و يكتبوا الحوار في صورة تغريدات.

8. أطلب من الطلبة يكتبوا تغريدات ليك عن عملية التَعَلُّم و التحديات اللي بيقابلوها. ممكن يكون أسهل علي الطلبة إنهم يناقشوا المشاكل اللي بتواجههم عن طريق تغريدات بدل من مناقشتها معاك بصورة شخصية.

9. إستخدم تويتر عشان تبعت تغريدات تفكَّر بيها الطلبة (تغريدات تذكيرية) بالواجبات المدرسية أو الإمتحانات أو مواعيد تسليم المشاريع الدراسية.

10. إسأل سؤال و أطلب من الطلبة يجاوبوا بتغريدة. الممارسة دي بتشجع المشاركة من الفصل كله، بدل مشاركة طالب واحد فقط و هو أول طالب بيرفع إيده عشان يجاوب.

11. إسمح للطلبة بوجود قناة للحوار بينهم علي تويتر أثناء إستماعهم للدرس، ده بيساعدهم يتعمقوا أكتر في الموضوع، و كمان بيديلك فرصة تتعرف علي عملية التفكير عندهم و توضح أي نقطة غامضة في الدرس.

12. أطلب من الطلبة يعملوا “ملخص تغريدي” لمقال معين في جريدة، أو مقال معين علي الإنترنت أو فصل من قصة بيدرسوها. يقروا الحاجة اللي حيلخصوها و يحددوا أهم العناصر و يصيغوها في صورة تغريدات. بنهاية الدرس أو بنهاية وحدة معينة في الكتاب المدرسي، الملخص ده ممكن يستخدموه الطلبة كدليل دراسي لهم.

13. جاوب علي أسئلة الطلبة علي الواجب المدرسي. الطلبة كمان ممكن يسألوك عن طريق رسالة خاصة أي سؤال ممكن ميكونوش يفضلوا إنهم يسألوه قدام بقية الطلبة في الفصل.

14. ساعد تلاميذك يكتبوا جريدة أو مجلة للفصل بإستخدام الوسائط المتعددة، و الجريدة دي مقالاتها تكون عبارة عن تغريدات.

15. ممكن كمان تدرس بعض مفاهيم نظرية الإحتمالات عن طريق طلب التصويت من الطلبة. إسألهم إيه فرصة إن حدث معين يحصل، زي مثلاً إن الدنيا تمطر أو إن فريق كرة معين يكسب، وبعد كده إعمل رسم بياني بالنتائج.

تويتر و المجتمع

من أهم نقاط القوة في تويتر هو قدرته علي ربط ناس من ثقافات مختلفة. التلاميذ في فصلك تويتر بيوصلهم بناس كتير ممكن يكونوا مصدر غني جداً من المعلومات و ده ممكن الإستفادة منه في الفصل. في نفس الوقت، المدرس و الطلبة في الفصل عندهم معلومات و معارف ممكن يتابدلوها مع غيرهم. دي بعض الأفكار اللي ممكن تستخدم بيها علاقاتك و علاقات تلاميذك علي تويتر في الفصل.

16. إعمل توثيق لرحلة ميدانية بإستخدام تويتر، التوثيق ده بيشمل توثيق نَصِّي بالتغريدات و توثيق فوتوغرافي بالصور، إلخ. النشاط ده بيشرك الآباء و الأمهات في العملية التعليمية، وممكن كمان يكون أساس لدروس في السنين التالية.

17. أطلب من الطلاب إنهم يغردوا بالأحداث اللي بتحصل في يوم معين في الفصل أو في المدرسة (يوم خاص في المدرسة مثلاً) للناس اللي بتابعهم في عالم تويتر.

18. ساعد التلاميذ إنهم يكتبوا قائمة بالناس أو بالجهات اللي ممكن يتابعوهم عشان يعرفوا مثلاً آخر الأخبار أو أحدث الإتجاهات في مجال معين أو أي شئ آخر ممكن يكونوا مهتمين به.

19. إستخدم المعلومات اللي بيديهالك تويتر عن مكان الناس اللي بتابعك، و أستخدم المعلومات دي في دروس عن الجغرافيا.

20. غرد بسؤال معين، وبعدين حلل إزاي الإجابات إتأثرت بمكان كل متابع (اللي هو مصدر كل إجابة).

21. تواصل مع الآباء و الأمهات و خليهم علي علم بالأحداث أو المناسبات اللي حتحصل قريب. مشاركة أولياء الأمور في الأحداث بتساعد علي إنخراط و مشاركة التلاميذ نفسهم.

22. حدد مدرسة تانية في مدينتك، أو أي مدرسة تانية في العالم، و تبادل التغريدات مع الطلبة هناك.

23. إستخدم خاصية البحث في تويتر و دوَّر علي موضوع معين، و بعدين ناقش نتائج البحث مع الطلبة.

24. لو بتشرح مفاهيم معينة في نظرية الإحتمالات مثلاً، ممكن تخلق تفاصيل أكثر في الدرس عن طريق التغريد بأسئلة علي تويتر. مثلاً، ممكن تسأل عن فرص سقوط المطر في البلد أو الموقع الجغرافي لكل متابع في قائمة متابعينك، و بعد كده حُط علامات علي خريطة تكون بتبين الإجابات في كل موقع، و بكده تقدر توضح العلاقة بين المكان و فرص سقوط المطر.

25. بالنسبة للطلبة في المراحل الدراسية المتقدمة، ممكن تنظم نشاطات أو ألعاب معينة بإستخدام تويتر، مثلاً فيه لعبة ممتعة جداً وهي إن فريقين يتنافسوا في مكان كبير جداً و مفتوح علي إنهم إزاي يلاقوا كنز متخبي في مكان معين. في حالتنا، خللي مثلاً الناس اللي بتشارك في اللعبة يكونوا من فصلين مختلفين أو حتي مدرستين مختلفين و التواصل بينهم مسموح فقط عن طريق تويتر.

26. بالنسبة للطلبة في المراحل الدراسية المتقدمة، ممكن تساعدهم يلاقوا المنظمات أو المحترفين اللي ممكن يساعدوهم بنصائح عن مسارهم المهني في السنين الجاية، و تابع التغريدات بينهم و بين المنظمات أو الجهات دي.

طور نفسك شخصياً و مهنياً بإستخدام تويتر

27. إبني مجتمع من المدرسين اللي بيدرسوا نفس المواد اللي إنت بتدرسها، وتعاونوا في التخطيط الدراسي أو علي وضع مخططات للدروس و تشاركوا مع بعض أفكاركم.

28. تابع القادة و الرواد في مجال التعليم، وخليك دايماً علي علم بأحدث الأخبار و الإتجاهات و الممارسات في مجال التعليم. تتبع الوسوم الشهيرة زي #edchat أو #edtech ممكن تجيب لك ثروة من التغريدات المفيدة.

29. راسل أصحاب الخبرة و الإهتمامات المشتركة لطلب نصيحة أو معلومة محددة.

30. حُط أساسات لتخصصك و خبرتك و معرفتك في مجالك و إبدأ بنشر التغريدات الخاصة بك عن التعليم. عرف الناس بالرابط الخاص بمدونتك عن طريق نشر الرابط في تغريدة. تشارك أفكارك و خبراتك عن أحدث الممارسات في التدريس.

قائمة النقط اللي ذكرناها فوق دي، و إن كانت مش شاملة، إنما بتدينا فكرة إزاي بقليل من الإبداع ممكن إننا نستخدم تويتر عشان نعزز المحادثات و حالات الحوار سواء داخل حدود الفصل أو مع العالم كله. لمعرفة أفكار تانية، جرب إنك تستخدم خاصية البحث في تويتر بإستخدام عبارات زي “تويتر في الفصل” أو “تويتر في التعليم” أو “Twitter in Classroom”.

**الترجمة الموجودة أعلاه ليست ترجمة حرفية علي الإطلاق، وما يعنينا في مدونة خوجة هو أن يجد القارئ خلاصة المقال الأصلي دون زيادة أو نقصان. نرحب دائماً بملاحظاتكم.

كاتب المقال:

أسرة المدونة (حساب الكاتب علي فيسبوك)

مصادر الصور:

1. Google Images

2. flickr.com

3. Getty Images

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s