25 صفة لازم تلاقيها في المدرس الناجح – مدونة خوجة

 Kristin_Olsen_School_Children_Picture
teachthought
رابط المقال الأصلي

لو سألت أي طالب أو تلميذ إيه اللي بيخليه شاطر في المدرسة، مش حتسمع عن كتاب جديد أو سلسلة مقاطع فيديو بتساعده، لكن غالباً حتسمع إجابة من نوعية:” الفضل يرجع للأستاذ فلان، هو اللي كان عنده إصرار إنه يعلمني”.

اللي بيكتسبه التلميذ من التعليم الناجح غالباً بيكون محوره أو نقطة إرتكازه علاقة و رابطة شخصية مع مدرس بينجح إنه يغرس فيه الشغف وحب المادة اللي بيدرسها له. من الصعب إننا نقيس النجاح، وفي عالم الأكاديميا، المدرسين دايماً بيعيدوا تقييم كيفية قياس التَعَلُّم. لكن يظل السؤال الأول و الأهم هو: هل المدرس بيقدر يوصل للطالب؟ تعالوا نشوف 25 صفة أو عادة لازم نلاقيها في المدرس الناجح.

1. المدرس الناجح له أهداف واضحة

إزاي تقدر تعرف إنك ماشي صح لو إنت ماشي في طريق جديد عليك؟ ممكن تستخدم علامات الطريق و خريطة مثلاً. في دنيا التعليم، أهدافك اللي بتحددها لتلاميذك هي علامات الطريق، و خطتك هي الخريطة. وضع خطة لشغلك مايقللش من قدر الإبداع في منهجك، بل إنه بيحط للإبداع إطار عمل ممكن يزدهر جواه.

2. المدرس الناجح عنده حس الغاية

مفيش حد فينا بيكون في أعلي حالاته طول الوقت و في كل الأيام. أحيانا بتكون الحياة رتيبة و مملة. المدرس الناجح بيكون عنده حس الغاية و الهدف، شايف الصورة الكبيرة و عينه علي الهدف النهائي من الدرس، فبيقدر يغلب الصعوبات و الأيام المملة في الشغل.

3. المدرس الناجح بيقدر يكمل شغل من غير نتايج أو ردود أفعال فورية

مفيش أسوأ من إنك تتعب علي وضع خطة لدرس، و بعدين متلاقيش مردود للي عملته بأي صورة، و لا حتي إبتسامة رضا من تلاميذك. بيكون صعب إنك تدي كتير و متلاقيش نتايج فورية. المدرس اللي بيعتمد علي النوع ده من الإشباع الفوري بيتحرف بسرعة و بيصاب بخيبة أمل. التعلم و تكوين العلاقات و التعليم هي كلها أنواع من السعي المجهد، زي بالضبط عملية الزراعة أو رعاية حديقة، مش بس بتاخد وقت، فكر كمان إيدك و هدومك بيجري لها إيه أثناء المحاولات دي.

4. المدرس الناجح بيبقي عارف إمتي ينصت للطالب و إمتي لأ

نقطة له صلة قوية بالنقطة اللي قبلها هي الفطنة و التمييز تجاه ردود أفعال التلاميذ. المدرس اللي مبيمعش من تلاميذه خالص، لازم حيفشل في النهاية، و المدرس اللي دايماً بيسمع لهم، بردو بيفشل في النهاية. إنك تعرف إمتي تسمع، و إمتي تتأقلم، و إمتي تتمسك بالخطة اللي حطتها للدرس، ده بردو نوع مش بسيط من السعي، إجتهد.

5. المدرس الناجح عنده دايماً سلوك إيجابي

الطاقة السلبية بتقتل الإبداع، وبتهيأ أرض خصبة للخوف من الفشل. المدرس الناجح عنده حيوية وطاقة، و بيقدر يشوف لحظات ما بعد الإنتكاسات في إتجاه هدفي النهائي. الإيجابية بتولد الإبداع.

6. المدرس الناجح دايماً بيؤمن بقدرة تلاميذه علي النجاح

يتساوي في الأمر ده المدرس و أولياء الأمور، الطالب في حاجة لحد يؤمن بيه، في حاجة لحد أكبر سناً و أكثر حكمة منه و في نفس الوقت يؤمن بقدراته. حط لتلاميذك أهداف كبيرة، وهيأ لهم بيئة مترعبهمش من الفشل، ساعتها حتلاقي الطلبة إتحفزوا إنهم يفضلوا يحاولوا لغاية ما يوصلوا للأهداف الكبير اللي حطيتها لهم في الأول.

7. المدرس الناجح بيكون عنده حس فكاهي

الفكاهة و خفة الدم بتصيب إنطباع حلو و بيدوم فترة طويلة. هي كمان بتقلل الإجهاد و الإحباط، و بتدي للنتاس فرصة إنهم يبصوا علي ظروفهم من وجهة نظر مختلفة. لو سألت ألف طالب من مدرسهم المفضل، الغالبية العظمي حيكونوا مدرسين لهم تصرفات مميزة، أقرب للهستيرية.

8. المدرس الناجح بيستخدم المدح و الإطراء بحكمة

الطالب أكيد بيحتاج تشجيع، لكن تشجيع حقيقي. مش كويس إنك تشكر في شغل الطالب لما تكون متأكد إنه يقدر يقدم ضعف اللي قدمه. في نفس الوقت، ما تخلقش بيئة مفيهاش مجال للمدح و التقدير، إخلق بيئة يكون مدحك للطالب له قيمة لأنه صادر بتعقل و حكمة.

9. المدرس الناجح بيكون عارف إزاي يقبل المخاطرة

فيه حكمة بتقول:”اللي بيروح بعيد، هو اللي بيكون عارف يقدر يروح لغاية فين”. قبول المخاطرات هو جزء من توليفة النجاح. تلاميذك بيكونوا محتاجين يشوفوك بتجرب حاجات جديدة في الفصل، و بيبقوا مراقبين إزاي إنت حتتعامل مع الفشل المحتمل أثناء قبول المخاطرة. ده مش أقل أهمية من المادة اللي بتدرسها.

10. المدرس الناجح ثابت علي مبدأ و سلوكه متناسق

الثبات علي المبدأ و السلوك المتناسق يعني إنك تعمل اللي قلت إنك حتعمله، متغيرش القواعد اللي حطتها علي أساس حالتك المزاجية، و تلاميذك يقدروا يعتمدوا عليك لو إحتاجوك. المدرس لما يتمسك بطرق قديمة و بالية في أمر معين، ممكن يكون ثابت علي مبدأ ده صحيح، لكنه في الحقيقة مش أكتر من عناد له قِناع.

11. المدرس الناجح يتأمل و يتفكر و يتبصر

عشان متكونش المدرس العنيد اللي مصاب بالجمود، لازم تاخد وقت تتفكر فيه عن طرق تدريسك، وطرق توصيل المعلومة، و طرق التواصل مع تلاميذك. التأمل و التصر ده بيكشف نقط الضعف اللي ممكن تتعالج بقليل من التفهم.

12. المدرس الناجح بيدور علي شخص أكثر خبرة منه عشان يرشده

المدرس اللي بيتفكر في اللي بيعمله بإستمرار ممكن يصاب ببؤس و إحباط مع الوقت لو معندهوش حد أكبر و أكثر خبرة منه يساعده و يعينه. مفيش حد كبير علي إنه يكون له ناصح أو مستشار. الناصح ده هو الصوت اللي حيقول لك إذا كان تأملك عن مسارك صحيح، أو مجحف و مبخس لحقك، و يدي لك منظور آخر.

13. المدرس الناجح بيتواصل مع أولياء أمور تلاميذه

التعاون بين ولي الأمر و المدرس أمر حاسم في نجاح الطالب. إخلق قناة إتصال بينك و بين أولياء الأمور، يكلموك لما تكون لهم مخاوف معينة، و إنت تبادلهم نفس السلوك. لما تكون مع ولي الأمر جبهة متحدة، ده بيقلل جداً من فرص تعرض الطالب لأي سقطات.

14. المدرس الناجح بيستمتع بشغله

من السهل إنك تلاقي مدرس بيحب شغله. بيبدو عليه و كأنه بيطلع طاقة، وكمان الطاقة دي بتكون معدية للي حواليه. حتي لو بنتكلم عن أصعب المواد، بتلاقي المادة دبت فيها الحياة. لو مش بتحب شغلك أو مادتك، ده حيظهر في تدريسك. حاول تعرف إيه سبب غياب الدافع و الحافز عندك. ممكن تكون حالتك ملهاش أي علاقة بالمادة و لكن بتوقعات إنتظرتها و مليقتهاش، إضبط توقعاتك شوية صغيرة، و إنت ممكن تلاقي حبك للتدريس رجع تاني بغزارة.

15. المدرس الناجح بيتأقلم مع إحتياجات تلاميذه

الفصل الدراسي زي كائن حي بيتطور بإستمرار، و ديناميكي جداً. ممكن تواجهك مواقف كتيرة تحتاج إنك تغير خطة كنت إنت وضعتها للدرس، ظروف اليوم أو عدد الحضور أو غيرها من عوامل تانية كتير. زي ما الفصل كائن حي بيتغير، أساليبك كمان أحياناً بتكون لازم تتغير. لو هدفك إنك تشجع مقرر معين بمحتوي معين، أو طريقة معينة في التدريس، حتاخد ضرورة تغيير طريقتك بشكل شخصي، أو ممكن كمان تعتبرها إهانة. لكن لو هدفك التواصل مع تلاميذك و الوصول ليهم، مش حتلاقي مشكلة في تبني طرق جديدة نافعة أكتر عشان تكمل طريقك.

16. المدرس الناجح بيرحب بالتغيير في الفصل

عمرك حسيت إنك زهقان من شكل بيتك و بعدين لما غيرت ترتيبه حسيت و كأنه بيت جديد؟ التغيير بيحفز العقل بروح الإثارة و المغامرة. حاول تغير في فصلك عشان تحافظ علي إنتباه تلاميذك. حاجات بسيطة جداً زي تغيير ترتيب المكاتب أو أي شئ روتيني آخر ممكن يخلق حياة جديدة في منتصف سنة دراسية طويلة.

17. المدرس الناجح بيقضي بعض الوقت في إستكشاف أدوات جديدة

مع التقدم التكنولوجي، ظهرت موارد و أدوات ممكن إنها تضيف وظائف و عمليات جديدة لقاعات الدروس و المحاضرات و المناهج كمان. التلاميذ و هم بطبيعة الحال أصغر منك سناً ممكن يكونوا إستخدموا أدوات و تقنيات إنت مستعملتهاش/إنتِ مستعملتيهاش قبل كده، مفيش خوف من إننا نجرب اللي يمكن تقدمه التكنولوجيا في قاعات الدرس و للعملية التعليمية بوجه عام. غالباً ما بيكونش فيه تمويل كافيي للجانب التكنولوجي في المدارس، لكن في الوقت الحالي و المناخ الحالي، أصبح من المؤكد إن التلاميذ حيكبروا يلاقوا التكنولوجيا بقيت في كل مكان، أكثر من وقتنا الحالي. خليك مدرس ناجح، ساعد تلاميذك و إديهم السبق في إستخدام التكنولوجيا عن طريق دمجها في بيئة التدريس و التَعَلُّم.

18. المدرس الناجح بيدي تلاميذه دعم وجداني أو عاطفي

أحياناً تلاميذك بيكونوا في حاجة إلي دعم وجداني أكتر من المعلومة. لما تتواصل مع تلاميذك وجدانياً بيكون فيه فرصة أكبر إنهم يسمعوا نصيحتك و يقبلوا مشورتك. الطالب بيحتاج لناصح أمين بقدر إحتياجه لمدرس ناجح.

19. المدرس الناجح ما ينزعجش من المجهول

عملية صعبة إنك تدرس في مكان متكونش عارف فيه مثلاً: الميزانية المتاحة ليك، أو مدي تدخل و مشاركة أولياء الأمور في العملية التعليمية، أو حتي نتيجة عملك الدؤوب كمدرس مجتهد. علي جانب فلسفي بعض الشئ، المدرس في المستويات الدراسية العليا بيكون مسئول عن توصيل المعلومة في مواد أصعب من التعليم الأساسي، وممكن يواجه المدرس فيها أسئلة معندوش علم عن إجابتها. إيه قدر إنزعاجك من إنك ميكونش عندك كل الإجابات؟ المدرس الناجح هو اللي يقدر يشتغل حتي في وجود بعض ظروف غير مثالية بالنسبة له.

20. المدرس الناجح ما بيحسش بتهديد من تدخل أولياء أمور التلاميذ

أحياناً المدرسين و أولياء الأمور بيكونوا مصدر تهديد لبعض. لو فيه مدرس مش مستقر أو مش واثق في وضعه كمدرس ممكن يحس إن تدخل أو مشاركة أولياء الأمور في العملية التعليمية بتمثل تهديد له. أي نعم، فيه أولياء أمور كتير بيبالغوا في التدخل و المشاركة، و بيكونوا منتظرين عشان يلفتوا الإنتباه لأخطاء المدرس، لكن أغلب أولياء الأمور بيكونوا عايزين مصلحة أولادهم فقط. المدرس الناجح بيكون واثق في قدراته و ما يشعرش بتهديد لما يقابل ولي أمر يكون عايز يدخل الفصل و يقول رأيه. المدرس الجيد بردو بيكون عارف إنه مش لازم يتبع توصيات أو نصايح ولي الأمر.

21. المدرس الناجح مصدر للمرح في الفصل

ما تبقاش جد أوي. في بعض الأيام، لازم المرح يكون الهدف. لما التلاميذ يحسوا و يشوفوا منك الجانب الإنساني مش بس شخصية المدرس، ده بيبني قاعدة للثقة و الإحترام. المرح و التعليم ماهماش بردو حاجتين كل واحدة فيهم بتستبعد التانية، أحياناً إستخدام الفكاهة ممكن يخلي موضوع ممل جداً يبقي شيق جداً.

22. المدرس الناجح له نظرة شمولية للعملية التعليمية بكل عواملها

عملية التَعَلُّم دي ما بتحصلش في الفراغ. الإكتئاب و القلق و الإجهاد العقلي بيكون لهم تأثير شديد علي التعليم. أمر مهم و حاسم جداً إن المدرس (و النموذج التعليمي بوجه عام) يأخد كل جوانب الشخصية و ظروف الشخص في الإعتبار. إنت ممكن تكون بتقول أكتر درس مسلي و مبتكر في مادة الجبر، لكن لو تلميذك مثلاً عنده مشكلة إجتماعية، بردو حيكون صعب عليك توصل له بالمعلومة.

23. المدرس الناجح بيفضل يتعلم..مفيش حاجة بتوقفه

المدرس الجيد بيلاقي وقت في جدول يومه عشان يتعلم. ده مش بس حيقوي معرفتك في موضوع أو مادة معرفية معينة، لكن ده كمان بيحطك في وضع الطالب. ده بيدي لك منظور عن العملية التعليمية ممكن أوي إنك تنساه لو إنت فضلت علطول في وضعية المدرس فقط.

24. المدرس الناجح بيعرف يتغلب علي قيوده الذاتية

أحياناً بتكون أكبر عقبة في طريقنا للتطوير هو إحنا. هل عمرك حطيت قيود علي طريقتك في التدريس؟ القيود دي ممكن تكون مثلاً نتيجة لتجربة شخصية. يعني مثلاً ممكن و إنت طالب، المدرس يكون طلب من بعض زملاءك تقييمك و طلب منك تقييم غيرك و هكذا، و لكن لأن تقييم زميلك لك كان سلبي، بقيت نظرتك سلبية جداً عن تقييم التلاميذ لبعضهم، و ممكن ده يخليك تتفادي أي نشاط من نفس النوع أثناء إلقاء الدرس. المدرس الناجح بيعرف يتغلب علي النوعية دي من القيود، بيعرف يقهر قيوده الذاتية.

25. المدرس الناجح أستاذ في مادته

المدرس الجيد عارف شغله. بالإضافة لمعرفته بمنهجية التدريس، لازم يكون بارع و متخصص في مادته. إوعي تبطل فضول و إوعي تبطل تتعلم عشان تفضل مدرس ناجح و تعرف تِعَلِّم.

**الترجمة الموجودة أعلاه ليست ترجمة حرفية علي الإطلاق، وما يعنينا في مدونة خوجة هو أن يجد القارئ خلاصة المقال الأصلي دون زيادة أو نقصان. نرحب دائماً بملاحظاتكم.

كاتب المقال:

أسرة المدونة (حساب الكاتب علي فيسبوك)

مصادر الصور:

1. Google Images

2. flickr.com

3. Getty Images

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s